На прашање дека предметот застарува токму поради измените на Кривичниот законик кои ги предложи Владата со која раководи Ковачевски и дека барањето за коментар е токму во овој контекст, премиерот рече дека измените на Кривичниот законик биле заради усогласување со европското законодавство, а не заради судски случаи за кои со години се водат постапки
За потсетување, Основниот кривичен суд Скопје вчера донесе решение за запирање на кривичната постапка за случајот за „Таргет-Тврдина” за обвинетите Горан Грујевски, Сашо Мијалков, Надица Николиќ, Владимир Варелов, Маријан Шумуликоски и Васил Исаковски за делата злосторничко здружување и злоупотреба на службена положба и овластување поради настапено застарување, согласно неодамнешните измени на КЗ со кои беа намалени затворските казни за овие дела и воведена горна граница
Одговорите за застарувањето на предметот за масовното прислушување „Таргет-Тврдина“, според премиерот Димитар Ковачевски, треба да се бараат во бавниот тек на водењето на постапката, а не во измените на Кривичниот законик што беа предложени од Владата.
Прашан за коментар во врска со вчерашниот расплет на главниот предмет на поранешното Специјално јавно обвинителство (СЈО), премиерот денеска изјави дека одговорите за ефикасноста со која се водел овој предмет не може да ги даде тој, туку тие што работеле на овој случај.
„Јас никогаш досега не сум коментирал судски постапки. Тоа што е карактеристично е што станува збор за случај, од она што е достапно јавно, којшто е започнат уште во 2015 година, којшто е во второстепена постапка веќе три години, меѓутоа во текот на тие осум години не бил завршен како случај. Така што, сите одговори за ефикасноста во однос на решавањето на случајот и во однос на текот јас не би можел да ги дадам, тоа можат да го дадат единствено оние коишто работеле на истиот. Така, тоа е одговорот што можам да го дадам“,
изјави Ковачевски одговарајќи на новинарски прашања по денешната посетата на компанијата „Вивакс“.
На дополнително прашање дека предметот застарува токму поради измените на Кривичниот законик кои ги предложи Владата со која раководи и дека барањето за коментар е токму во овој контекст, премиерот рече дека измените на КЗ биле заради усогласување со европското законодавство, а не заради судски случаи за кои со години се водат постапки.
Ако било така, додаде Ковачевски, тогаш во земјава би требало да се воведе незастарување и сите судски случаи да можат да траат со децении.
„Предлог-законот и целото решение на измените коишто беа на Кривичниот законик и коишто се однесуваа на усогласување со европски директиви во делот на конфискација на имот и во други делови вклучително и на одредени членови коишто се усогласуваат со законодавства на земји членки на Европската Унија, на точно 19 од нив, и на речиси сите земји членки на Советот на Европа беше направено заради усогласување, а не заради судски случаи коишто се наоѓаат во постапка осум, девет, десет години итн., бидејќи по таа теза тоа би значело дека кај нас би требало да се воведе незастарување на ништо и да сите судски случаи можат да траат по 50, 60 години кога би биле решавани. Меѓутоа, сепак праксата на земјите членки на Европската Унија укажува на рокови, коишто рокови обезбедуваат судење согласно со пракса којашто нуди ефикасност за сите странки во процесот“,
кажа премиерот.
За потсетување, Основниот кривичен суд Скопје вчера донесе решение за запирање на кривичната постапка за случајот за „Таргет-Тврдина” за обвинетите Горан Грујевски, Сашо Мијалков, Надица Николиќ, Владимир Варелов, Маријан Шумуликоски и Васил Исаковски за делата злосторничко здружување и злоупотреба на службена положба и овластување поради настапено застарување.
Со ова застаруваат кривичните дела за нелегалното прислушување за предметот, а во судница остануваат обвинетите што се опфатени со делот за уништување на опремата.
Трошоците за водењето на кривичната постапка паѓаат на товар на Буџетот на државата.
Судијата Илија Трпков на рочиштето рече дека кривичниот совет го имал во предвид предлогот на јавниот обвинител изнесен пред почетокот на денешната главна расправа за предметот.
Обвинителката Ленче Ристоска која го застапува обвинението по денешното рочиште изјави дека „за жал, нема да имаме кривично-правна разрешница и во овој случај и повторно нема да има одговорност за незаконското прислушување во државата“.
Целосната застареност на случајот, вели Ристоска, е директна последица на измените во Кривичниот законик.
Прашана за тоа кој ќе ги плаќа штетите за прислушувањето со ваква правна завршница на предметот, обвинителката Ристоска вели дека трошоците за кривичната постапка паѓаат на товар на Буџетот. На товар на државата, додаде таа, паѓаат и трошоците за обесштетување на лицата кои биле оштетени од прислушувањето.
Инаку, предметот „Таргет-Тврдина“ по втор пат се најде на судење во Основниот кривичен суд во Скопје, откако Апелација кон крајот на минатата година ја укина првостепената пресуда од предходниот процес, во кој на 12 години затворска казна беше осуден ексшефот на УБК, Сашо Мијалков, а највисоки казни од по 15 години добија двајцата избегани контраразузнавачи од т.н. Петта управа на тогашната УБК, Никола Бошковски и Горан Грујовски.
Во случајот беа обвинети вкупно 11 лица, кои со првостепената пресуда, која Апелација ја укина, беа осудени на вкупно 55 години затвор и 10 години условен затвор. Апелацискиот суд Скопје во декември лани соопшти дека ги уважил жалбите на седуммина обвинети во случајот, односно на сите осудени на затворски казни, со исклучок на Владимир Варелов кој доби условна казна од две години.
Одлуката на Апелација предизвика многу контроверзии, бидејќи на второстепениот суд му требаше долго време, повеќе од девет месеци, да одлучи по жалбите. Ова беше причина Судскиот совет да оформи работна група која изврши вонредна контрола во Апелацискиот суд.
Заклучоците од контролата беа презентирани на седница на Судскиот совет на 11 јануари и според нив Апелацискиот суд во Скопје неразумно долго, без да наведе причини ги чувал предметите. Најголеми критики, според презентираното тогаш, имаше токму кон судијата што беше известител на „Таргет-Тврдина“, Енвер Беџети, бидејќи, како што беше посочено, во негова надлежност е динамиката на движење на предметот, посебно по одржувањето на јавната седница.
Првиот судски процес започна во декември 2017 година, а пресудата беше донесена по повеќе од три години, односно во февруари 2021 година. Одлуката за нејзино укинување од Апелација, пак, беше донесена во декември 2022 година.