Според одлуката што на 17 јуни ја донесе Уставен, претседателот и членовите на судот од 1 октомври треба да земаат повисоки плати, односно тие да бидат пресметувани според коефициентите што за нив важеа со законското решение од 2024 година. Така, за пресметка на платата на претседателот на Уставен ќе се зема коефициентот 3,08, а за членовите на судот коефициентот 2,85
Собраниската Комисија за прашања на изборите и именувањата денеска едногласно ја усвои одлуката на Уставниот суд за измена на дел од членовите на Законот за определување коефициенти за утврдување на платите на претседателот, пратениците и функционерите што ги избира и именува Собранието. Имено, станува збор за постапка што на законодавниот дом му ја наложи Уставниот суд во јуни откако ги укина измените на Законот од февруари годинава, во делот на коефициентите по кои се пресметуваат платите на претседателот и на судиите во Уставен.
Според одлуката што на 17 јуни ја донесе Уставен, претседателот и членовите на судот од 1 октомври треба да земаат повисоки плати, односно тие да бидат пресметувани според коефициентите што за нив важеа со законското решение од 2024 година. Така, за пресметка на платата на претседателот на Уставен ќе се зема коефициентот 3,08, а за членовите на судот, коефициентот 2,85. Што се однесува до другите функционери што ги избира и именува Собранието, за нив остануваат да важат измените од февруари оваа година, односно нивните плати остануваат исти.
Како што појасни претседателот на надлежната собраниска комисија, Ѓорѓија Сајкоски, тие како тело мораат да постапат по одлуката на Уставниот суд.
„Комисијата за избори и именувања како надлежна комисија мора да постапи по одлуката на Уставниот суд на Република Македонија, која беше донесена фактички со суспендирање на дел од Законот за платите и надоместоци на избраните и именуваните функционери. Со предлог-одлуката се предлагаат измени во членот 1 од одлуката за определување коефициенти за утврдување плата. Во точка 5: ‘претседател на Уставниот суд на Република Македонија’, коефициентот 2,81 се заменува со коефициент 3,08. Во точка 16: ‘судија на Уставен суд на Република Македонија’, коефициентот 2,60 се заменува со коефициент 2,85“,
наведе Сајковски на денешната седница на Комисијата за избори и именувања.
Откако надлежната Комисија за прашања на изборите и именувањата ги усвоија измените, сега тие треба да поминат и на пленарна седница на Собранието.
За појаснување, Собранието кон крајот на февруари годинава донесе измени на Законот со кој ги намали платите, односно коефициентите за пресметување на платите на избраните и именувани лица, а со тоа и намалување на, условно кажано, функционерските плати.
Во членот 14, кој го опфаќа и претседателот на Уставен суд, коефициентот беше намален од 3,08 на 2,81. Во членот 15, кој се однесува на судиите во Уставниот суд, оваа ставка односно коефициент се намали од 2,85 на 2,60. Инаку, за пресметка на платата на избраните и именуваните лица во Република Северна Македонија се зема просечната плата помножена со коефициентот.
Но, веќе во јуни мнозинството уставни судии донесе одлука да се укинат овие членови и тие да престанат да важат од 1 октомври, а пресметката на нивните плати да се врши според коефициентите од измените на Законот донесени во 2024 година, односно 3,08 за претседателот и 2,85 за судиите на Уставниот суд.
Одлуката, како што образложија тогаш од Уставен, судиите ја донеле откако по сопствена иницијатива и со решенине од 4 јули повеле постапка за оценување на уставноста на деловите од одредбите од Законот.
Поконкретно, во однос на укинатите одредби, во образложението беше наведено дека иако законодавецот, Собранието, има право да ги определува платите во јавниот сектор, вклучително и платите на функционерите, сепак не може и не смее да ја игнорира уставната поставеност на Уставниот суд.
„Имајќи го предвид фактот дека од содржината на членовите 14 и 15 од Законот за плати и други надоместоци на избрани и именувани лица во Република Македонија, произлегува дека коефициентот за утврдување плата на претседателот на Уставниот суд е ист со коефициентот на потпретседателот на Собранието, додека коефициентот за утврдување плата на судија на Уставниот суд е ист со член на Владата, претседател на работно тело на Собранието, гувернер на Народната банка, државниот правобранител, народниот правобранител, секретарот на Собранието и секретарот на Владата, несомнено произлегува дека со наведените одредби платите на претседателот и судиите на Уставниот суд се уредуваат во ист нормативен режим и со иста законска логика како платите на другите носители на јавни функции од законодавната, извршната и монетарната власт итн“,
наведоа од Уставниот суд во образложението на одлуката.
Според Уставен, уредувањето на платите на претседателот и судиите на Уставниот суд под ист нормативен режим со другите носители на јавни функции е суштествена повреда на владеењето на правото како темелна вредност на уставниот предок.