„Донесена е ИКТ-стратегија со акциски план и е формирано Меѓуинституционално координативно тело за ИКТ и справување со безбедносни предизвици, кое е во постојана координација за сите прашања во однос на безбедноста на податоците и заштитата од хакерски напади“, велат од комисијата
Во континуитет се работи на заштита на податоците на избирачите и заштита од хакерски напади, соопштија денеска од Државната изборна комисија (ДИК) одговарајќи на новинарско прашање од Македонската новинска агенција (МИА) дали во пресрет на претстојните претседателски и парламентарни избори се работи на заштита на личните податоци на избирачите, со оглед дека изминатиот период имаше хакерски напади во одредени државни институции.
„ДИК во континуитет работи на заштита на податоците на избирачите и заштитата од хакерски напади. За таа цел донесена е ИКТ-стратегија со акциски план и е формирано Меѓуинституционално координативно тело за ИКТ и справување со безбедносни предизвици, кое е во постојана координација за сите прашања во однос на безбедноста на податоците и заштитата од хакерски напади“,
велат оттаму.
Инаку, минатата недела Македонскиот електропреносен оператор (МЕПСО) АД Скопје соопшти дека се соочува со кибернапад. Оттаму рекоа дека не е загрозен целосниот интегритет на електроенергетската мрежа и снабдувањето со електрична енергија.
Оттаму посочија и дека критичната електроенергетска инфраструктура не е цел на нападот.
Министерот за транспорт и врски Благој Бочварски неколку дена по кибернападот во МЕПСО рече дека се информирал за состојбата во компанијата, од каде што му било кажано дека критичната инфраструктура е заштитена.
„Најважно е тоа што критичната инфраструктура е заштитена и што МЕПСО своите обврски од делот на преносот на електрична енергија го врши редовно и непречено, што е многу важно за граѓаните и компаниите“,
рече Бочварски
Неколку дека потоа, од МЕПСО соопштија дека нивната веб-страница повторно е во функција.
Минатата година беше хакирана веб-страницата на Фондот за здравствено осигурување (ФЗО) поради што граѓаните со денови не можеа да ги користат услугите на Фондот, а здравствените работници не ги добија навреме своите плати.
Тогашниот премиерот Димитар Ковачевски рече дека хакираната веб-страница на Фондот е дел од хибридната војна која се води во Европа. Нагласи дека на санирање на проблемот во нашето ФЗО работат експерти од Германија, но и од други партнерски држави.
