„Најважно е тоа што критичната инфраструктура е заштитена и што МЕПСО своите обврски од делот на преносот на електрична енергија го врши редовно и непречено, што е многу важно за граѓаните и компаниите“, вели Бочварски
Се работи на надминување на проблемот со хакерскиот напад во МЕПСО и враќање на компанијата во тековно работење, вели министерот за транспорт и врски Благој Бочварски.
Бочварски вели оти денеска разговарал со раководството на компанијата, како и со директорот на ИТ-секторот од каде што му било кажано дека критичната инфраструктура е заштитена.
„Најважно е тоа што критичната инфраструктура е заштитена и што МЕПСО своите обврски од делот на преносот на електрична енергија го врши редовно и непречено, што е многу важно за граѓаните и компаниите“,
рече Бочварски одговарајќи на новинарски прашање по извршениот увид во изградбата на експресниот пат Ранковце – Крива Паланка.
Тој, исто така, рече дека се информирани сите надлежни институции и оти се работи и со домашна и со меѓународна поддршка во делот на надминување на сите овие прашања со цел комплетно да се врати во функција тековното и редовно работење на компанијата.
Ваквите кибернапади, како што рече Бочварски, не се нови и се случуваат и во другите држави од регионот.
Вчера, од Македонскиот електропреносен оператор (МЕПСО) АД Скопје информираа дека се соочуваат со кибернапад, но, како што соопштија од компанијата, целосниот интегритет на електроенергетската мрежа и снабдувањето со електрична енергија не се загрозени.