На собраниската седница за пратенички прашања, премиерот откри детали од новиот пакет мерки за санирање на економските последици од здравствената криза
Бришење на каматите на долговите што граѓаните ќе се согласат да ги платат на 12 рати, финансиска поддршка за угостителството, транспортот и медиумите… Ова се дел од мерките за кои се размислува да бидат вметнати во петтиот антикризен пакет, како што објави премиерот Зоран Заев, на денешната собраниска седница за праатенички прашања.
„Мерката е да ги избришеме сите камати по долгови, што граѓаните ги имаат кон државните и општинските институции, за долгови кои се постари од три месеци, под услов да си го регулираат долгот на 12 рати. Тоа значи за вода, за парно, даноци кон државата, кон станбените претпријатија, кон водостопанските претпријатија. Целта ни е, не веднаш да го платат долгот, не можат веднаш, туку на 12 рати да склучат договори, но да ги избришеме комплетно каматите и со тоа да им олесниме. Имаме многу јавни претпријатија, државни и општински, коишто не може да ги наплатат и редовните сметки, заради тоа што ги книжат граѓаните како должници, а граѓаните не може и стари и нови сметки да плаќаат. Оттука намерата е да ги избришеме сите камати за долговите кои се за физички лица, за граѓаните кои допираат до државните и општинските институции. Со законско решение тоа е можно“,
рече Заев.
Во однос на угостителството, тој рече дека се таргетираат хотели надвор од туристичките места.
„Тие хотели кои беа во туристичките места беа помогнати со ваучерите од 6 000 денари помош на граѓаните и некако ја поминаа туристичката сезона. Но хотелите надвор од туристичките места беа затворени или со минимум присутни. Сакаме да дадеме грантови или одредени мерки, иако дел од економските министри се за тоа да имаме мотивирачки мерки. За тутунот ќе имаме сигурно мерка оваа година и верувам дека министерот за земјоделство, шумарство и водостопанство, заменикот и неговиот тим навистина ќе искреираат убав пакет како да помогнеме. Медиумите се директно погодени, плаќаат 49 милиони и 500 илјади. Цел на Владата е, без да има било какви интеракции со медиумите, да помогне кај АВМУ, а АВМУ ако може да ги ослободи медиумите од таа концесија.За тоа купче од 50 милиони денари за сите медиуми можеме, да помогнеме“,
рече Заев.