Компаниите ќе бидат ослободени од царинските давачки за една година
Се укинува царината за 71 тарифна ознака кои се однесуваат на преработувачката индустрија. Оваа денеска на својот фејсбук – профил го објави министерот за економија, Крешник Бектеши, појаснувајќи дека одлуката е на барање на стопанските комори и на поединечни компании.
„Ова е една од мерките кои се дел од петтиот сет антикризни мерки. Можноста за укинување на царинските стапки ќе важи од 1 феврури до 31 декември 2021 година“,
напиша Бектеши.
Попладнево и Владата соопшти дека на денешната 40. седница донела одлука со која компаниите ќе бидат ослободени од царинските давачки за една година кои во 2019 година изнесуваа 162,4 милиони евра, со цел да се зголеми извозната конкурентност на преработувачка индустрија.
„Ова е првата усвоена мерка од новиот, петти пакет економски мерки за справување со последиците од ковид-19, се изготвени од страна на Стопанската комора по консултација со компаниите од метало-преработувачката индустрија, металургијата, текстилната и кожарската индустрија“,
соопштија од владината прес-служба.