На Јовановски, во јавноста познат како Боки 13, неодамна му беше прекинато издржувањето на затворската казна за случајот „Рекет“ каде што е правосилно осуден на девет години затвор поради здравствената состојба во која се наоѓа. Тој денеска се појави во Апелацискиот суд Скопје на јавна седница за случајот „Меѓународен сојуз“. Пред судот тој изјави дека му била констатирана интестинална метаплазија на желудник и на дел од тенките црева, состојба поради која, како што рече, не е во состојба да ја издржува казната во затвор
Бојан Јовановски, во јавноста познат како Боки 13, денеска се појави во Апелацискиот суд во Скопје на јавната седница во врска со жалбите на првостепената пресуда за случајот „Меѓународен сојуз“, во кој Јовановски е осуден на деветгодишна затворска казна.
Јовановски на затворска казна со исто времетраење правосилно е осуден и во случајот „Рекет“, но неодамна скопскиот Основен кривичен суд на барање на неговите адвокати донесе одлука за прекин на издржувањето на казната поради неговата лоша здравствена состојба.
Тој пред неколку месеци беше хоспитализиран на Клиниката по хируршки болести „Свети Наум Охридски“ во Скопје поради хируршка интервенција – тотална гастректомија, односно целосно отстранување на желудникот.
Јовановски денеска пред Апелацискиот суд Скопје изјави дека му била констатирана интестинална метаплазија на желудник и на дел од тенките црева, состојба поради која, како што рече, не е во состојба да ја издржува казната во затвор.
„Со оваа здравствена состојба не бев и не сум во состојба да бидам во затворот каде ја издржував казната на која бев правосилно осуден и поради тоа сум пуштен на домашно лекување односно на прекин на издржување казната затвор. Со себе носам цела терапија за да функционирам, покрај тоа што имам сериозен хигиено-диететски режим кој изискува посебна храна за да функционирам. Имам проблеми од органски карактер“,
ја пренесува МИА изјавата на Јовановски пред Апелацискиот суд.
Во неа тој појаснува дека нема физички проблем, туку дека станува збор за органско заболување.
„Јас сум со траен инвалидитет, кој не е од физичка природа или со физички деформитет, туку станува збор за состојба која не може да се промени. Имам сериозна терапија која ја примам, сериозен и строг режим кој морам да го практикувам секој ден. Тоа не значи дека имам проблем со движење, но имам моменти кога морам да мирувам, да се придржувам кон тоа“,
вели Јовановски.
Тој правосилно е осуден на девет години затвор во случајот „Рекет“ за кривичните дела примање награда за противзаконито влијание и за перење пари.
Во истиот случај на затворска казна од седум години е осудена и поранешната специјална јавна обвинителка Катица Јанева.
Што се однесува до судењето за предметот „Меѓународен сојуз“, за кој денеска се одржува јавна седница во Апелацискиот суд, тоа заврши на 7 април минатата година со изречени три затворски, една условна и една ослободителна пресуда.
Судскиот процес траеше нешто помалку од две години. Имено, Обвинителството за гонење организиран криминал и корупција (ОЈО ГОКК) обвинението го поднесе на 3 јануари 2020 година, на 12 мај истата година тоа беше одобрено од судот, а судскиот процес почна во јули 2020 година.
Првообвинет во случајот е Бојан Јовановски – Боки 13, кој со првостепената пресуда е осуден на по пет години за двете кривични дела измама и перење пари, кои судот му ги пресмета во единствена казна од девет години. Јасна Ерцеговиќ доби по две и пол години за помагање во двете дела и беше осудена на единствена затворска казна од четири години. Христина Блажевска беше осудена на една година затвор, но само за делото помагање во делото перење пари, додека за делото измама таа доби ослободителна пресуда.
Во случајот беше опфатен и таткото на Боки 13, Миле Јовановски, кој беше осуден на две години условна казна која нема да се изврши доколку во рок од пет години не стори ново кривични дело. Поранешната висока функционерка на СДСМ и пратеничка, Фросина Ременски, која исто така се гонеше во случајот под обвинение за помагање во кривичното дело измама, доби ослободителна пресуда.
Со првостепената пресуда за виновен како правно лице беше прогласен и Меѓународниот сојуз и беше задолжен да плати еден милион денари.
Обвинението на ОЈО ГОКК во судскиот процес го застапуваше поранешната шефица на ова обвинителство Вилма Русковска, додека со судечкиот совет, кој ја изрече и првостепената пресуда претседаваше судијката Софче Гаврилова-Ефремова.
Русковска неодамна беше едногласно разрешена од функцијата јавен обвинител од страна на Советот на јавни обвинители откако против неа и уште две нејзини колешки беше поведена дисциплинска постапка поради претресот во Управата за финансиска полиција пред речиси една и пол година.
Обвинителството ги товареше обвинетите дека под превезот на невладината организација „Меѓународен сојуз“ двајцата бизнисмени Силјан Мицевски од градежната компанија „Пелистер“ и Ардијан Амзоски од „Дрим билдинг“ биле доведени во заблуда и измамени со проекти за изградба на Европски центар за возрасни лица и мобилни сервиси и дале речиси еден милион евра – Мицевски сума од 719 905, а Амзоски 233 821 евро.
Првообвинетиот Јовановски и на почетокот и на крајот од судскиот процес ги отфрли сите обвинувања, тврдејќи дека немало ниту намера, ниту мотив, ниту идеја да бидат доведени во заблуда двете компании „Пелистер“ и „Дрим билдинг“, со кои потпишале договори и се повика и на сведочењата на бизнисмените кои рекле дека веруваат во проектот.
Јавната седница во Апелацискиот суд Скопје во врска со жалбите на првостепената пресуда досега неколкупати беше одложувана.