„Ваквата одлука, иако е задоцнета, истата е за поздравување како законита, правична и, пред сè, хумана. Донесена е врз основа на две последователни позитивни мислења од надлежниот јавен обвинител, во рамки на иста постапка, и врз основа на комплетната медицинска документација за здравствената состојба на осуденото лице“, вели неговиот адвокат Владимир Туфегџиќ
Бојан Јовановски, кој е правосилно осуден во случајот „Рекет“, доби прекин на издржувањето на долгогодишната затворската казна поради здравствената состојба во која се наоѓа.
Информацијата, која ја објавија повеќе медиуми, за ТВ Телма ја потврдил неговиот адвокат Владимир Туфегџиќ, кој рекол дека Јовановски, инаку во јавноста познат како Боки 13, треба да биде пуштен на слобода, а во моментот се наоѓа во болница.
„По однос на прашањето за кое пројавувате интерес, како бранител ја потврдувам информацијата дека Основниот кривичен суд Скопје донесе одлука за прекин на издржувањето на казната затвор за осуденото лице Бојан Јовановски и истата е доставена до него. Ваквата одлука, иако е задоцнета, истата е за поздравување како законита, правична и, пред сè, хумана. Донесена е врз основа на две последователни позитивни мислења од надлежниот јавен обвинител, во рамки на иста постапка, и врз основа на комплетната медицинска документација за здравствената состојба на осуденото лице“,
вели Туфегџиќ.
Од Основниот кривичен суд Скопје засега нема официјална потврда на информацијата.
Јовановски кон средината на март годинава беше хоспитализиран на Клиниката за хируршки болести „Свети Наум Охридски“ во Скопје поради хируршка интервенција – тотална гастректомија, односно целосно отстранување на желудникот.
Оттогаш неговите адвокати во повеќе наврати повикуваа да му биде прекинато издржувањето на казната поради влошеното здравје и дека во затворот не може да биде соодветно лекуван.
Инаку, Јовановски правосилно е осуден на девет години затвор во случајот „Рекет“ за кривичните дела примање награда за противзаконито влијание и за перење пари.
Во истиот случај на затворска казна од седум години е осудена и поранешната специјална јавна обвинителка Катица Јанева.
На Јовановски му се судеше и во случајот „Меѓународен сојуз“, каде што првостепено исто така е осуден на девет години затвор за кривичните дела измама и перење пари.