Од правниот тим повторно ги обвинија судските власти и Управата за извршување санкции дека поради „апсолутно и крајно непочитување на издадените задолжителни препораки и мислења на стручните колегиуми на државните клиники дошло до оваа непосакувана и ризична здравствена состојба на Јовановски“
Бојан Јовановски, познат по прекарот Боки 13, кој е осуден и издржува затворска казна за случајот „Рекет“, денеска во 10 часот бил хоспитализиран во Универзитетската клиника за хируршки болести „Свети Наум Охридски“ во Скопје поради хируршка интервенција – тотална гастректомија, односно целосно отстранување на желудникот, соопштија неговите адвокати.
Правниот тим на Јовановски изминатиов период во повеќе наврати преку соопштенија во јавноста информираше за влошување на неговата здравствена состојба и бараше од Основниот кривичен суд Скопје прекин на извршувањето на затворската казна.
„Согласно специјалистичкиот извештај, ве информираме дека за извршувањето на операцијата која по својот карактер е сложена, високоризична и со неизвесен исход од истата, формиран е тим на повеќе хирурзи – специјалисти од областа кои ќе ја извршат операцијата, а истовремено напоменуваме дека хирурзите специјалисти се оградуваат од ризикот и одговорноста за исходот од оперативниот зафат, дотолку повеќе што тие навремено и повеќекратно даваа категорични препораки и укажувања преку конзилијарните стручни мислења да не дојде до оваа операција и да се избегне овој мутилантен хируршки зафат, од причини што самата хируршка интервенција е високоризична и сложена, придружувана со можни компликации кои можат да бидат кобни за пациентот“,
се наведува во соопштението од правниот тим на Јовановски.
Од правниот тим повторно ги обвинија судските власти и Управата за извршување санкции дека поради „апсолутно и крајно непочитување на издадените задолжителни препораки и мислења на стручните колегиуми на државните клиники дошло до оваа непосакувана и ризична здравствена состојба на Јовановски“.
„Целата оваа ситуација и операцијата можеше да се избегне доколку властите кои одлучуваа по барањата за прекин (на извршувањето на казната н.з.) ги почитуваа специјалистичките препораки кои категорично укажуваа дека ќе дојде до сето ова, бидејќи во затворски – пенални услови нема можност за лекување и третирање на болеста на пациентот“,
велат од адвокатскиот тим.
На Јовановски по денешната хоспитализација во наредните денови ќе му бидат извршени сите потребни испитувања и подготовки за операцијата.
Адвокатите на Јовановски веќе поднеле ново барање за прекин на издржување на казната затвор и очекуваат од Судот да донесе одлука во итен рок, која, како што се наведува во соопштението, ќе биде темелена на реални факти и неселективна оценка на доказите со примена на начелото на хуманост.
„Во овие чувствителни моменти за Бојан Јовановски и неговото семејство, ја повикуваме јавноста на солидарност и емпатија, како доблесни карактерни особини на секој поединец, бидејќи со овој пример на Бојан Јовановски имаме за цел да ги укажеме негативните појави, а истовремено да дадеме придонес кон подобрување на јавното добро“,
наведуваат од адвокатскиот тим на Јовановски.
Вчера родителите на Бојан Јовановски, Јасминка и Миле Јовановски, преку писмо до медиумите информираа дека ќе поднесат кривични пријави против лица од правосудството, органи на извршната власт и здравствени работници поради „организирано и здружено дејствување и соизвршување од безобѕирна одмазда, користољубие и по нарачка“ со што се доведува во прашање животот на нивниот син.
Тие изразија сериозна загриженост за актуелната здравствена состојба во која се наоѓа нивниот син и наведоа дека како граѓани на оваа држава се чувствуваат загрозени и огорчени од „организираната тортура и линч што му се случуваат на Бојан целиот овој период, на него лично, а и на целото наше семејство како рефлексија од омразата, нечовечноста и антагонизмот кон Бојан“.
Јовановски во „Идризово“ издржува правосилна затворска казна од девет години за „Рекет“, случај во кој на седум години беше осудена и поранешната специјална обвинителка Катица Јанева.