Првостепениот судски процес за случајот „Меѓународен сојуз“, кој се водеше пред Основниот кривичен суд Скопје, заврши лани на 7 април со изречени три затворски, една условна и една ослободителна пресуда. На највисока казна од девет години затвор за кривичните дела измама и перење пари беше осуден Бојан Јовановски, во јавноста познат како Боки 13, а поранешната висока функционерка на СДСМ и пратеничка во Собранието, Фросина Ременски, доби ослободителна пресуда
Обвинителството ги товареше обвинетите дека под превезот на невладината организација „Меѓународен сојуз“ двајцата бизнисмени Силјан Мицевски од градежната компанија „Пелистер“ и Ардијан Амзоски од „Дрим билдинг“ биле доведени во заблуда и измамени со проекти за изградба на Европски центар за возрасни лица и мобилни сервиси и дале речиси еден милион евра – Мицевски сума од 719 905, а Амзоски 233 821 евро
Јавната седница на Апелацискиот суд Скопје за случајот „Меѓународен сојуз“, на која треба да се разгледуваат жалбите на странките во врска со првостепената пресуда на Основниот кривичен суд Скопје, е презакажана за 5 јуни. Седницата првично беше закажана и требаше да се одржи вчера, но поради отсуство на првообвинетиот во случајот Бојан Јовановски, познат во јавноста како Боки 13, доби нов термин.
Јовановски, кој со првостепената пресуда доби казна од девет години затвор за кривичните дела измама и перење пари, сè уште е во болница каде што закрепнува по хируршката интервенција на желудникот.
За одложувањето на јавната седница и новиот термин кога таа треба да се одржи денеска информираа од Апелацискиот суд Скопје.
Покрај отсуството на Јовановски, второстепениот суд вчера, исто така, констатирал и дека нема уредна достава на поканата за обвинетата Јасна Ерцеговиќ поради промена на адресата на живеење.
„Јавната седница пред Апелацискиот суд Скопје по кривичниот предмет КОКЖ-153/22 во јавноста познат како ‘Меѓународен сојуз’ закажана за ден 24.04.2023 година, се одложи поради неможност на обвинетиот Б.Ј.од С. да присуствува на седницата по скоро извршена хируршка интервенција кој се уште е хоспитализиран и ја прима неопходната нега, додека за обвинетата Ј.Е. нема уредна достава, за што судот е известен од бранителот дека има промена на адреса непријавена во судот, по што е задолжен бранителот во рок од три дена да ја достави точната адреса. Заради тоа судот насрочи нов термин за јавна седница на 05.06.2023 година во 11:00 за што странките и присутната јавност беа усно известени“,
се наведува во соопштението на Апелација, објавено денеска на официјалната интернет-страница на судот.
Судскиот процес за случајот „Меѓународен сојуз“, кој се водеше пред Основниот кривичен суд Скопје, заврши на 7 април минатата година со изречени три затворски, една условна и една ослободителна пресуда.
Судскиот процес траеше нешто помалку од две години. Имено, Обвинителството за гонење организиран криминал и корупција (ОЈО ГОКК) обвинението го поднесе на 3 јануари 2020 година, на 12 мај истата година тоа беше одобрено од судот, а судскиот процес почна во јули 2020 година.
Првообвинет во случајот е Бојан Јовановски – Боки 13, кој со првостепената пресуда е осуден на по пет години за двете кривични дела измама и перење пари , кои судот му ги пресмета во единствена казна од девет години. Јасна Ерцеговиќ доби по две и пол години за помагање во двете дела и беше осудена на единствена затворска казна од четири години. Христина Блажевска беше осудена на една година затвор, но само за делото помагање во делото перење пари, додека за делото измама таа доби ослободителна пресуда.
Во случајот беше опфатен и таткото на Боки 13, Миле Јовановски, кој беше осуден на две години условна казна која нема да се изврши доколку во рок од пет години не стори ново кривични дело. Поранешната висока функционерка на СДСМ и пратеничка, Фросина Ременски, која исто така се гонеше во случајот под обвинение за помагање во кривичното дело измама, доби ослободителна пресуда.
Со првостепената пресуда за виновен како правно лице беше прогласен и Меѓународниот сојуз и беше задолжен да плати еден милион денари.
Обвинението на ОЈО ГОКК во судскиот процес го застапуваше поранешната шефица на ова обвинителство, Вилма Русковска, додека со судечкиот совет, кој ја изрече и првостепената пресуда претседаваше судијката Софче Гаврилова-Ефремова.
Обвинителството ги товареше обвинетите дека под превезот на невладината организација „Меѓународен сојуз“ двајцата бизнисмени Силјан Мицевски од градежната компанија „Пелистер“ и Ардијан Амзоски од „Дрим билдинг“ биле доведени во заблуда и измамени со проекти за изградба на Европски центар за возрасни лица и мобилни сервиси и дале речиси еден милион евра – Мицевски сума од 719 905, а Амзоски 233 821 евро.
- „Меѓународен сојуз“: Силјан Мицевски сведочеше дека дал 720 000 евра и верувал дека Владата ќе помогне во проектите за старски домови
- Амзоски за „Меѓународен сојуз“: Не верував дека сум измамен, поддршката од функционери ми беше најбитна
- Бизнисменот Амзоски бара отштета од 195 000 евра во случајот „Меѓународен сојуз“
Првообвинетиот Јовановски и на почетокот и на крајот од судскиот процес ги отфрли сите обвинувања, тврдејќи дека немало ниту намера, ниту мотив, ниту идеја да бидат доведени во заблуда двете компании „Пелистер“ и „Дрим билдинг“, со кои потпишале договори и се повика и на сведочењата на бизнисмените кои рекле дека веруваат во проектот.
Боки 13 тврдеше дека во целиот случај тој е оној кој бил измамен и злоупотребен од претставници на тогашната владејачка гарнитура на чело со поранешниот премиер, Зоран Заев.
Инаку, Јовановски е осуден на деветгодишна затворска казна за случајот „Рекет“, каде пресудата, за разлика од онаа во „Меѓународен сојуз“ е правосилна. Покрај него, во случајот „Рекет“, на седум години затвор правосилно е осудена и поранешната шефица на СЈО, Катица Јанева.