Бизнисменот Ардијан Амзоски од фирмата „Дрим билдинг“ – Струга бара отштета од 195 000 евра во случајот со невладината организација „Меѓународен сојуз“ – Скопје, во кој обвинителството тврди дека е еден од двајцата измамени бизнисмени.
Амзоски барањето го поднел и писмено, а денеска тоа го посочи и во судница пред обвинетите.
„Сакам да се приклучам кон кривичното гонење во предметот и пријавувам побарување за штета од 195 000 евра“,
рече Амзоски.
Другиот бизнисмен, Силјан Мицевски, пак, не се појави денеска да каже дали и колкава отштета бара. Но, појасни судијката, тој може да се произнесе за ова во текот на понатамошната постапка.
Според обвинението, од страна на „Меѓународниот сојуз“ на чело со Бојан Јовановски-Боки 13 двајцата бизнисмени биле доведени во заблуда и измамени преку проекти за изградба на Европски центар за возрасни лица и мобилни сервиси, па преку Македонската авторска агенција исплатиле речиси еден милион евра, Мицевски сума од околу 720 000, а Амзоски околу 233 000 евра.
И двајцата на едно од наредните рочишта ќе се појават како сведоци во судницата.
Во предметот, Јовановски, кој е претседател на „Меѓународниот сојуз“, е првообвинет и се товари за делата измама и перење пари. Јасна Мандиќ-Ерцеговиќ, заменик-претседателка на невладината, и асистенката на Боки, Христина Блажевска, пак, се обвинети за помагање во овие дела, а поранешната пратеничка Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.
Денешното судско рочиште е во тек, а на него обвинителката Ивана Трајчева од Обвинителството за гонење организиран криминал и корупција ги презентира материјалните докази.