Бизнисменот Силјан Мицевски, кој преку неговата фирма „Пелистер“ му дал околу 720 000 на „Меѓународниот сојуз“-Скопје за проекти за старски домови, денеска сведочеше во предметот каде што се обвинети првите луѓе на оваа организација, претседателот Бојан Јовановски-Боки 13, заменик-претседстелката Јасна Мандиќ-Ерцеговиќ, асистенката на Јовановски, Христина Блажевска, неговиот татко Миле Јовановски и почесната претседателка и поранешна пратеничка Фросина Ременски.
Мицевски меѓу причините зошто верувал во „Меѓународниот сојуз“ го наведе тоа што Боки му оставил добар впечакот, но и дека на состаноците во невладината му кажале дека ова е владин проект. Неговата фирма „Пелистер“, според договорот, требало да гради комплекс за стари лица во Градиште во Охрид, на државно земјиште што требало да го купат, како и во Битола, на земјиште во сопственост на неговата фирма, за кое требало само да се направи пренамена.
„На еден состанок во ‘Меѓународниот сојуз’ јас поставив прашање како може да се откупи земјиштето без урбанизација и ми беше речено дека тоа е проект на Владата и дека тоа ќе оди со европско знаменце, но таква работа не се случи. Имаше повеќе луѓе, не знам кој го изусти тоа, дали Бојан, дали Јасна, дали Фросина, дали Кирац не знам. Така ми беше појаснето“,
рече Мицевски.
На прашање на обвинителката Ивана Трајчева дали обвинетата Ременски негирала дека тоа е владин проект, бизнисменот одговорил дека никој од присутните не негирал.
„Ако некој негираше, ќе се развиеше друга дискусија, а дали знаеја или не, тоа не знам, тие си знаат. Главно, никој не негираше“,
рече Мицевски.
Тој рече дека, сепак, од власта не мрдале со прст за проектот да го види светлото на денот, а од одговорите што ги даваше понатаму на прашањата од одбраната не стана сосема јасно што подразбира под владин проект.
„Ќе се согласите ли дека кога велите владин проект мислите на проект кој бил поддржан од Владата, како и милион други?“,
праша Јовановски.
„Како Владата ги смета проектите не знам, зашто никогаш не сум бил во влада. Главно, со ниеден потег не го покажаа тоа. Тие во ниту еден момент не дадоа помош за да се реализира што било“,
одговори сведокот.
Мицевски уште еднаш спомена „владин проект“ на крајот, кога судијката го праша дали смета дека нешто невистинито му било прикажано.
„Невистинито испадна, и тоа е срамота за мене, можеби требаше да проверам, зашто го сметав како владин проект и дека со европско знаменце дека ќе оди како подмачкано. Тоа испадна – дека немало европско знаменце, не бил ниту владин проект. Барем така се одвиваа работите“,
рече Мицевски.
За двајцата поранешни функционери, Фросина Ременски и Александар Кирацовски, тој претходно зборуваше дека биле често на состаноците што ги имале во „Меѓународниот сојуз“ и рече дека тие во основа биле замолени да помогнат да се обезбеди локацијата во Охрид и да разговараат со градоначалничката на Битола за пренамена на дозволата за да може на неговата приватна локација да изградат дом за стари лица.
„Фросина беше повеќе ангажирана и сакаше да помогне, за разлика од Кирацовски, кој се криеше и многупати ќе ветеше, но не исполнуваше. Фросина е и потпретседател, не знам дали тоа ја тераше да помогне, но моето чувство беше дека сака да помогне“,
рече бизнисменот.
Така, раскажуваше, Ременски била со Боки во Охрид на средба со градоначалникот, но набргу се случила несреќата тој да почине и работата се закочила. Исто така, експратеничката, но и Кирацовски биле на средбата со градоначалничката на Битола.
Меѓутоа, на прашањата од одбраната тој негираше дека тие му влијаеле да потпише договор со „Меѓународниот сојуз“ ниту, пак, рече дека ѝ се заканувале на градоначалничката Петровска.
„Имаше конструктивен разговор. Јас кажав, дојдоа Фросина и Бојан, потоа се вклучи и Кирацовски и разговараа со градоначалничката за тоа што јас 100 пати сум го разговарал, дека е добро да има таков проект во Битола. Најголем трошок ѝ беше да свика седница на советот и да направат пренамена“,
рече Мицевски.
Тој рече дека 720 000 евра ги исплатил преку агенција, а не на сметка на „Меѓународниот сојуз“, бидејќи му кажале дека таков им е принципот на работа. До денес, како што рече, парите не му се вратени иако ги барале назад. Сепак, рече, ако го послужи здравјето, ќе го реализира проектот во Битола бидејќи земјиштето секако е негово, а потоа ќе ѝ го даде на некоја заинтересирана организација да стопанисува со него.
Со сведочењето на Силјан Мицевски, заврши и изведувањето на доказите и сослушувањето на сведоците на обвинителството. Од наредното рочиште одбраната ќе продолжи со докажување на својата теза. Адвокатот Сашко Дуковски, кој е бранител на Јовсноваки, верува дека ќе докажат оти не станува збор за измама и за вештачки проект, дека ќе покажат што било преземено од „Меѓународниот сојуз“ за да реализираат проектите, но оти работата затаила кај институциите.
Во предметот Бојан Јовановски-Боки 13 е првообвинет и се товари за делата измама и перење пари. Јасна Мандиќ-Ерцеговиќ и асистенката Блажевска, пак, се обвинети за помагање во овие дела, а Фросина Ременски се товари за помагање во делото измама. Таткото на Боки, Миле Јовановски, пак, е петтообвинет за помагање во перењето пари и за делото неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. Како правно лице обвинета е и невладината организација.