Пред точно 3 години ве повикавме на реформирање за да спречиме расформирање на ВМРО-ДПМНЕ! Ви кажавме дека ако не се реформираме по брза постапка ќе ги изгубиме сите избори и на крај ќе се распаднеме! Сега е веќе започнат процес на расформирање на партијата, „граѓанската војна“ е во тек, а обидот на Груевски и Мицкоски со наводни реформи да спречат расформирање е повеќе од трагикомичен, пишува на својот профил на Фејсбук лидерот на Македонски концепт, Петар Богојески, кој беше дел од реформаторското крило на ВМРО-ДПМНЕ.
Статутарните промени во партијата вели дека се како „товење свиња после Божиќ“ и дека во нив нема ништо суштинско.
„Реформите во ВМРО-ДПМНЕ опфаќаа три фази: промена на акти, кадри и политики! До овој момент, освен глума за наводни ‘реформирања’ по стоти неуспешен пат од екипата на Мицкоски, ништо суштински не е спроведено! Акти! Во новиот Статут на ВМРО-ДПМНЕ не се имплементирани ниту 50% од предлозите на Внатрепартиската иницијатива за реформи на ВМРО-ДПМНЕ, а изборот на лидерот и неговите момоци, останува по негова слободна волја, без никаква суштинска измена од досегашната пракса! До сега не е направена измена на ниту еден друг акт на партијата, особено на скандалозните решенија за борба со “домашните предавници и надворешни душмани!“,
вели Богојески.
Тој вели дека ВМРО-ДПМНЕ станала приватна компанија на Мијалков и Груевски, а Мицкоски бил само менаџер кој лесно може да го заменат со друг.
„Господин Мицкоски ревносно ги исполни сите задачи кои ги доби од господата Груевски, Мијалков и Протоѓер! Целта беше да се спречи правдата, да се спасат криминалците, да се уништи СЈО, да се замени името Македонија за личната слобода на малкумина, а не да се реформира ВМРО-ДПМНЕ и да се победи на избори! Во овој момент, во знак на благодарност, господин Мијалков е во мисија да го куртули господин Мицкоски и да му го продолжи рокот на траење! Доколку не се покаже за возможно, ќе се промовира “ново лице” за извршен директор, кој ќе клима пред газдите Мијалков, Груевски и Протоѓер! Што е тука реформирано? П.С. После војна, илјада генерали! Така ми изгледа оваа состојба каде се појавија милион реформатори да прослават за реформиве! Па да имавме толку реформатори за време на реформите, Груевски ќе го симневме за половина ден!“,
пишува Богојески.