Во ист ден кога Централниот комитет на ВМРО-ДПМНЕ очекувано даде поддршка за измени на Статутот на партијата, но и поддршка за Мицкоски да преговара за формирање влада, сѐ уште актуелните пратеници на опозицијата, Никола Попоски и Даниела Рангелова, се приклучија кон повиците за оставка на Мицкоски
Со разлика од 7 минути, порталите „Курир“ и „Република“ вечерва објавија, повикувајќи се на свои извори, дека Централниот комитет на ВМРО-ДПМНЕ едногласно го овластил Христијан Мицкоски да преговара за идно коалицирање и обезбедување на мнозинство по изборите на 15 јули.
Како што дознаваат и двата медиума, Мицкоски по обраќањето изјавил дека ќе направи сѐ што е во негова моќ за да обезбеди мнозинство за состав на новата влада, но не власт по секоја цена.
„Црвените линии се нашите принципи и вредности во кои веруваме и врз кои почива идејата на ВМРО-ДПМНЕ и современата македонска држава“,
изјавил Мицкоски, по што имало громогласен аплауз, пренесуваат „Курир“ и „Република“.
Според двата портали, расправата на ЦК на ВМРО-ДПМНЕ продолжила со дискусија по повеќе точки од дневниот ред.
Аплауз во партијата, критики во јавноста
И додека „Курир“ и „Република“ дознаваат дека обраќањето на Мицкоски зад затворени врати завршило со „громогласен аплауз“, на јавната сцена се слушаат и поинакви оценки. Токму во денот кога партијата го одржува својот Централен комитет, во јавноста настапија двајца се уште актуелни пратеници на ВМРО-ДПМНЕ со барање претседателот на партијата да си поднесе оставка.
Во колумна за порталот Мкд.мк насловена „Не умирај магаре до зелена трева, на рати“, пратеникот Никола Попоски, а поранешен министер за надворешни работи и член на ИК на ВМРО-ДПМНЕ, апелираше до сегашното раководство во „белата палата“ да се држи до најавите што ги даде пред изборите и да покаже дека сериозно е сфатена пораката од гласачите.
„Ако и сега некој е изненаден, тогаш никој нема да биде. Веднаш да најавиме дека недвосмислено, со оглед на исходот, остануваме во опозиција, ќе биде побезболно за членството отколку да создаваме нереални надежи за потоа да ги разочараме дополнително по кој знае кој пат. Целосно ќе изгубат мотив“,
оценува Попоски.
Попоски, кому сега му завршува пратеничкиот мандат, а со тоа и мандатот како претседател на Националниот совет за евроинтеграции, беше меѓу функционерите кои се залагаа да не се бојкотира референдумот за името за да не се блокираат евроатлантските перспективи на земјава.
Само неколку часа по Попоски, уште една актуелна пратеничка и поранешна висока партиска функционерка го повика Мицкоски да се повлече. Даниела Рангелова, во гостувањето на ТВ 24, беше уште појасна во својот повик, обвинувајќи го не само Мицкоски туку и актуелното раководство на партијата дека се уште ја тераат политиката на Никола Груевски и дека не знаат на кои гласачи им се обраќаат. За разлика од Попоски, таа отворено ги коментираше и состојбите во партијата, како на пример дека Мицкоски доцни како Груевски, дека слуша само мал број советници околу него, а не членството и органите и дека за разлика од Груевски не знае да одбира кадри.
Рангелова кажа и дека меѓу членството никој не верува во калкулациите на Мицкоски дека тој треба да формира влада.
„Мислам дека меѓусебе, најреално, ние членовите разговараме – дали некој верува во тоа дека Христијан Мицкоски може да направи влада и да ги одземе гласовите на СДСМ, да биде победник заради тоа што коалицирале со БЕСА?
СДСМ одлучил пред изборите да коалицира со албанска партија. Истата можност ја имал и Христијан Мицкоски. И на крај, ако сега прави влада Христијан Мицкоски, кои се црвените линии на ВМРО-ДПМНЕ? Ако терате една кампања „Името не го даваме“, „Тиранска платформа“, „Кантонизација“, „Ќе ја спасуваме државата“ – во кого вие сега гледате потенцијал да коалицирате. Во ДУИ, којшто вика дека ако не го признаат Преспанскиот договор не сака да разговара? Истото е со Алијанса, истото е и со ДПА која има еден пратеник. Или можеби со Левица каде во програмата пишува дека ќе треба да се тргне името ВМРО, да го нема во името на ниту една политичка партија”,
изјави Рангелова.
Рангелова и Попоски се дел од акутелните пратеници кои не се најдоа на листите за овие избори, но тие се уште се членови на најголемата опозициска партија. И Рангелова како Попоски повикуваше ВМРО-ДПМНЕ да не го бојкотира референдум, но и двајцата не гласаа за уставните измени.
Критичките гласови стануваат хор
Но Рангелова и Попоски не се единствените кои јавно побараа реформи во ВМРО-ДПМНЕ и оставка на Христијан Мицкоски. Тоа веќе го сторија и исклучените од партијата, односно групата независни пратеници без чии гласови немаше да се смени Уставот и без чиј глас земјава немаше да стане членка на НАТО.
Тие „со жалење” констатираа дека Христијан Мицкоски и донел пораз на ВМРО-ДПМНЕ, а со тоа, потврда дека на партијата и се неопходни реформи и темелна чистка, со цел нејзина демократизација. Според нив, членството не дозволило ВМРО-ДПМНЕ да биде претворена во партија налик на грчката Златна зора.
„Удар“ за Мицкоски беше и повикот за оставка од еден од малкутемина градоначалници на ВМРО-ДПМНЕ, Митко Јанчев. Првиот човек на Кавадарци настапи со слични аргументи како и другите негови сопартијци споменати во овој текст.
„Јас воопшто не разбирам зошто не го признаваат Договорот за пријателство со Бугарија, како и Договорот од Преспа. Во принцип, ова е лоша политика и лошо раководство на ВМРО-ДПМНЕ. Мора да има приземјување на лидерството, вклучително и промена. Ова се нештата. Нема ништо друго“,
вели Јанчев.
Во неговото интервју за БГНЕС тој беше јасен и дека планира да се приклучи кон промените во ВМРО-ДПМНЕ.
Во ВМРО-ДПМНЕ не чуле дека некој бара оставки
Се почестите и се погласните повици за оставка, за промени и за демократизација на партијата, актуелното раководство на ВМРО-ДПМНЕ одбива да ги дискутира.
Пред вчерашниот Извршен комитет на партијата, портпаролот на ВМРО-ДПМНЕ Димче Арсовски изјави дека нема да има точка на дневниот ред на која би се барало оставка од Мицкоски. Според него, никој не барал такво нешто.
„Дека членството би побарало оставка од претседателот Мицкоски првпат слушам, како што потенцирав и претходно, имаме потполно право и кредибилитет како политичка партија која освои најмногу пратенички мандати како партија, на овие избори да одиме во поход за формирање ново парламентарно мнозинство и нова влада“,
изјави портпаролот Арсовски.
Додека дебатите на партиските тела се зад затворени врати, јавно Мицкоски добива поддршка на Фејсбук. Случајно или не, пред неколку дена и во рок од неколку часа, десетина членови на највисокото партиско раководство и идни пратеници на ВМРО-ДПМНЕ објавија заеднички фотографии со Мицкоски со пораки за поддршка на лидерот.