Поранешниот висок партиски функционер и министер за надворешни работи апелира до сегашното раководство во „белата палата“ да се држи до најавите што ги даде пред изборите и да покаже дека сериозно е сфатена пораката од гласачите
Повик до Христијан Мицкоски да се повлече од лидерската позиција во ВМРО-ДПМНЕ упати и Никола Попоски, поранешен висок функционер на партијата, кој своевремено се споменуваше како можен нов лидер, за по конгресот во Валандово да се дистанцира од дневно-политичките збиднувања.
„Минимум за тоа дека сме ја сфатиле пораката на гласачите е да се држиме до најавеното пред изборите. Во спротивно, следна рунда може дури и бетер да минеме. Ако и сега некој е изненаден, тогаш никој нема да биде. Веднаш да најавиме дека недвосмислено, со оглед на исходот, остануваме во опозиција, ќе биде побезболно за членството отколку да создаваме нереални надежи за потоа да ги разочараме дополнително по кој знае кој пат. Целосно ќе изгубат мотив“,
оценува Попоски.
Во колумна за МКД.мк насловена „Не умирај магаре до зелена трева, на рати“, Попоски посочува дека, дури и да испаднеше, како што најавуваа од ВМРО-ДПМНЕ, опозицијата да освои 57 пратенички места, формирањето влада ќе беше тешко. На изгубени избори, како што забележува, не е полесно.
„Не умирај магаре до зелена трева, на рати – не е идеална стратегија. Тие што можат да земат учество во одлуки (на ЦК, ИК, ОК, МК, КИМ) легитимно е да нѐ прашаат дали ние воопшто сакаме да се обидеме да победуваме? Што исто не е лесна работа. Ако одговорот е – не, тогаш е сосем во ред да продолжиме да си тераме со заклучоците“,
нагласува поранешниот министер за надворешни работи, кој на претходните парламентарни избори во 2016 година година беше носител на листата на ВМРО-ДПМНЕ во првата ИЕ.
Тој го презентира својот став за изборниот исход откако вчера ИК на ВМРО-ДПМНЕ го овласти лидерот Христијан Мицкоски да почне разговори со други партии за формирање влада, додека дел поранешни партиски функционери бараат негова оставка.
За време на кампањата, Мицкоски најави дека ќе се повлече од партиското кормило ако не победи на изборите и ако не успее да формира влада. Тоа, како што посочи, се двата услова.
Попоски, кому сега му завршува пратеничкиот мандат, а со тоа и мандатот како претседател на Националниот совет за евроинтеграции, беше меѓу функционерите кои се залагаа да не се бојкотира референдумот за името за да не се блокираат евроатлантските перспективи на земјата. Сепак, тој не беше меѓу пратениците кои гласаа за уставните измени, поради што и не се соочи со исклучување од ВМРО-ДПМНЕ, каде што моментно не извршува партиска функција.
Оставка од Мицкоски побара и градоначалникот на Кавадарци и поранешен потпретседател на партијата, кој беше тргнат од функцијата поради поддршката за уставните измени.
Од централата на ВМРО-ДПМНЕ, пак, тврдат дека членството нема да бара оставка од Мицкоски ниту, пак, како што велат, има потреба од тоа.