„Кога одлуката ја носат луѓе што забегале од социјалдемократијата, можам да кажам дека таа е признание за мојот борбен дух и дека ништо и никакви закани не можат да ме скротат да го направам тоа во кое што вистински верувам, а тоа се реформите и промените за подобро“, вели пратеничката и поранешна министерка за одбрана, коментирајќи го разрешувањето од функцијата заменик-координаторка на пратеничката група на СДСМ во Собранието
На прашањето што ќе значи оваа одлука за нејзината работа во Собранието како пратеник, посочи дека останува во рамките на пратеничката група на СДСМ
Пратеничката и поранешна министерка за одбрана Славјанка Петровска е разрешена од функцијата заменик-координаторка на пратеничката група на Социјалдемократскиот сојуз (СДСМ) и коалицијата во законодавниот дом.
Коментирајќи ја одлуката на раководството на СДСМ, во гостување на 4ТВ, вели дека не и била посочена конкретна причина за разрешувањето, бидејќи, како што додава, во досегашната работа како пратеник не и се укажани сериозни забелешки.
„Денеска беше соопштена одлуката и беше побарано да се испрати известување од сите членови на пратеничката група од СДСМ и коалицијата. Бидејќи сум директно засегната, меѓу првите реков дека апсолутно немам никаков проблем со тоа. Во политиката и во СДСМ не влегов заради функции и заради остварување на лични цели и амбиции. Влегов заради идеологија. И тоа е така и така и ќе остане. Функциите се минливи. Секогаш кога една функција ќе заврши, следната која ме чека е многу повисока“,
вели Петровска.
Очекувала, како што вели дека ќе добие образложение, односно објаснување за разрешувањето, но дека не е изненадена, бидејќи во изминатиот период се уверила дека во рамки на најтесното раководство на партијата се помалку има демократски капацитет за дискусија.
Веста за нејзиното разрешување ја дознала денеска на координација во Собранието на која бил присутен и лидерот на СДСМ, Венко Филипче.
„Реков дека колегите не треба да чувствуваат тежина кога ќе се потпише. Кога одлуката ја носат луѓе што забегале од социјалдемократијата, можам да кажам дека таа е признание за мојот борбен дух и дека ништо и никакви закани не можат да ме скротат да го направам тоа во кое што вистински верувам, а тоа се реформите и промените за подобро“,
додава таа.
Препоставува, како што вели дека причина за ваквата одлука е нејзиното учество во платформата „Разговори за иднината во 12:05“, бидејќи досега немала забелешки на нејзината работа како пратеник.
На прашањето што ќе значи оваа одлука за нејзината работа во Собранието како пратеник, посочи дека останува во рамките на пратеничката група на СДСМ.
„Ќе го дадам својот максимум да одговорам на задачите што ќе бидат побарани од мене, но тоа нема да влијае на моите ставови и мислења. Ако раководството има други намери или други цели, тоа може да го соопшти. Јас сум и секогаш ќе останам дел од СДСМ, без разлика дали тоа некому му се допаѓа или не“,
кажа пратеничката.
За тоа дали стравува од можноста за целосно исклучување од партијата, Петровска рече дека никој не може да ѝ забрани да се чувствува и да дејствува како социјалдемократ.
Според неа, во СДСМ расте поддршката за промени и демократизација на партијата. Порача дека партијата наместо да се занимава со разликите во бројот на освоени гласови, треба да се фокусира на идеите, идеологијата и политиките со кои ќе им се обрати на граѓаните.
Во врска со можноста раководството на СДСМ да побара од неа да се откаже од пратеничкиот мандат, Петровска посочи дека тој произлегува од волјата на граѓаните и дека за евентуално такво барање би требало да се спроведе соодветна партиска постапка.
„Ако Венко Филипче и најтесното раководство продолжат да ја трошат енергијата во СДСМ за вакви прашања, тогаш граѓаните и членството е убедено дека партијата не оди во добар правец. Во политиката никогаш не разговарате и не се фокусирате на еден човек, се фокусирате на идеи, особено кога сте дел од раководство, имате одговорност за тоа. Се фокусирате на идеи, на идеологија и вашата идеологија да преовлада и да победите на изборите. Се останато е лов во матно“,
рече Петровска.
Оцени дека продолжувањето на внатрепартиските конфликти е губење време, додека власта предводена од ВМРО-ДПМНЕ, останува без сериозен политички предизвик од опозицијата.
„Ако органите што ми ја дале довербата да се најдам прва на изборната единица 6 и донесат одлука дека од икс причини треба да се повлечам, јас тоа ќе го направам, немам проблем со тоа. Ако сметаат дека најголемиот проблем во СДСМ во моментов е пратеничкиот мандат на Славјанка Петровска и дека ако јас го вратам, магично се ќе се смени и СДСМ одеднаш ќе се вивне, јас тоа ќе го направам. Но, сметам дека проблемот поради кој што СДСМ сега тоне нема врска со мене и е многу поразличен“,
посочи таа.
Платформата „Разговори за иднината во 12:05“ на почетокот на месецот во партиската архива на СДСМ на „Бихаќска“ ги доставија предлозите за структурни промени во партијата.
Предлозите, како што информираат од Платформата преку објава на нивната фејсбук-страница, ги доставиле Игор Ивановски, Славјанка Петровска и Коста Начевски.