Во врска со „Таргет-Тврдина“, директорот на невладината вели дека во нивните извештаи тој е издвоен поради невообичаено долгото траење на постапката за овој предмет пред Апелацискиот суд од речиси две години
Застарување на делата за масовното прислушување опфатени во предметот „Таргет-Тврдина“ би требало да настапи во 2025 година
По одлуката на Апелацискиот суд Скопје да ја укине првостепената пресуда за случајот „Таргет-Тврдина“ и да го врати предметот на повторно судење, директорот на невладината Коалиција „Сите за правично судење“, Дарко Аврамовски, смета дека повторно може да се очекува долга првостепена постапка во Основниот кривичен суд Скопје и оти е веројатно дека ќе настапи застарување на предметот.
Аврамоски ова го кажа во изјава за медиумите во рамките на денешната завршна конференција за презентација на годишните извештаи од мониторингот на Коалицијата „Сите за правично судење“ на работата на Судскиот совет и на Советот на јавните обвинители и од мониторингот на судските постапки во судовите во државата.
Во врска со предметот „Таргет-Тврдина“, директорот на невладината вели дека во извештаите тој е издвоен поради невообичаено долгото траење на постапката за овој предмет пред Апелацискиот суд од речиси две години.
Инаку, овој предмет во извештаите на Коалицијата „Сите за правично судење“ е наведен како незавршен бидејќи, како што напомена Аврамовски, одлуката на Апелацискиот суд дошла по завршувањето на процесот на мониторинг на невладината.
„Како што беше завршен процесот на мониторинг, се случи да имаме одлука од Апелацискиот суд во однос на овој предмет. Предметот беше издвоен како таков поради неговото невообичаено долго траење во постапката во втор степен, односно речиси две години беше овој предмет пред Апелацискиот суд и оттаму сметавме дека е важно да се истакне како таков предмет, да се прикаже динамиката на одвивање на истиот затоа што еве особено сега со ваквата пресуда на Апелацискиот суд и враќањето на предметот можеме да очекуваме дека повторно ќе имаме една многу долга постапка бидејќи има ризик од настапување на застареност и за истиот е многу веројатно таа да настапи“,
рече Аврамовски.
Застарување на делата за масовното прислушување опфатени во предметот „Таргет-Тврдина“ би требало да настапи за во 2025 година.
Со оглед на должината на судските постапки, со враќањето на предметот на повторно судење, со одлуката на Апелација, патот тоа да се случи е отворен, имајќи ја предвид должината на судските постапки.
Имено, првиот судски процес за „Таргет-Тврдина“ започна во декември 2017 година, а пресуда беше донесена во февруари 2021 година. Апелација одлучи да ја укине во декември 2022 година. Ова значи дека од првото судско рочиште во Кривичен, до неправосилната пресуда, а потоа и до одлуката на Апелација беа потребни пет години.
За да не дојде до застарување, сега целата постапка и пред првостепениот и пред второстепениот суд ќе треба да заврши за помалку од три години, секако доколку и во второто одлучување Апелација не реши повторно да ја укине пресудата.
Откако во петокот објавија само кратка информација, а и по бурата реакции во јавноста, од Апелација денеска излегоа со соопштение во кое објаснуваат зошто решиле да ја укинат пресудата.
Осудителната пресуда на Основниот кривичен суд Скопје за масовното прислушување и уништување на опремата за следење на комуникациите во случајот „Таргет-Тврдина“ била нејасна, неразбирлива и неподобна за понатамошно испитување, оценил петчлениот совет во Апелацискиот суд кој одлучи да ја укине пресудата и да го врати предметот на повторно судење.
Петчлениот совет кој ја донесе одлуката беше на чело со судијата Јани Нича. Судија известител беше Енвер Беџети, а останатите тројца членови беа: Ѓоко Ристов, Тања Милева и Лидија Чачева.
Како постапувале апелациските судии, денеска ќе биде тема на дискусија на итна седница на Судскиот совет. Итната седница ја закажа претседателката на Советот, Весна Дамева, а освен за „Таргет-Тврдина“ се очекува да се расправа и за други предмети кои долг период чекаат Апелација да се изјасни.
„Таргет-Тврдина“ е главен предмет од аферата за масовното нелегално прислушување, а со првостепената пресуда ексшефот на УБК, Сашо Мијалков, беше осуден на 12 години затвор.
Покрај него а затворска казна од четири години беше осудена поранешната министерка за внатрешни работи Гордана Јанкулоска. Највисоки казни од по 15 години затвор добија двајцата избегани контраразузнавачи од т.н. Петта управа на тогашната УБК, Никола Бошковски и Горан Грујовски.
Во случајот беа обвинети вкупно 11 лица, кои со првостепената пресуда, која Апелација сега ја укина, беа осудени на вкупно 55 години затвор и 10 години условен затвор.