Се очекува Судскиот совет да расправа за постапувањето на Апелација и во други предмети
Претседателката на Судскиот совет, Весна Дамева, за денеска попладне свика итна седница за постапувањето на Апелацискиот суд Скопје во случајот „Таргет-Тврдина“ откако во петокот од второстепениот суд објавија дека ја укинале осудителната пресуда и случајот го вратиле на повторно судење пред Основниот кривичен суд Скопје.
Покрај за „Таргет-Тврдина“, како што е објавено, се очекува Судскиот совет да расправа за постапувањето на Апелација и во други предмети.
„Расправа по изнесените информации во јавноста за постапувањето на Апелациониот суд Скопје по предметот познат како ’Таргет-Тврдина‘, како и по други предмети од интерес за јавноста кои се на надлежно постапување во Апелацискиот суд Скопје“,
пишува во дневниот ред за денешната итна седница.
Дамева изминатиов викенд во писмената изјава до медиумите посочи дека Судскиот совет не може да ја оценува одлуката на Апелација, но може да ја констатира состојбата за текот на постапката.
„Судскиот совет во рамките на своите законски надлежности ќе го испита конкретниот случај и за преземените дејствија и констатираната фактичка состојба ќе бидете навремено известени. Укажувам дека Судскиот совет нема надлежност да преиспитува, односно да оценува судска одлука, но има надлежност да ја констатира состојбата за текот на постапката во смисла на ажурно постапување и дали одлуката била донесена од страна на судија на кој му престанал мандатот поради исполнување на услови за старосна пензија“,
наведе Дамева.
Во „Таргет-Тврдина“ одлучуваше петчлен совет од Апелација на чело со Јани Нича. Судија известител беше Енвер Беџети, а другите тројца членови беа: Ѓоко Ристов, Тања Милева и Лидија Чачева.
По една година и речиси десет месеци од пресудата на Кривичен, а по околу девет месеци од одржана јавна седница за жалбите во Апелација, петчлениот совет конечно одлучи и во петокот објави дека ја укинува пресудата затоа што констатирал дека првостепениот суд при постапувањето во „Таргет-Тврдина“ сторил суштествени повреди на одредбите од Законот за кривичната постапка кои се од апсолутен карактер, а на кои овој суд внимава по службена должност.
„Таргет-Тврдина“ е главен предмет од аферата за масовното нелегално прислушување, а со првостепената пресуда ексшефот на УБК, Сашо Мијалков, беше осуден на 12 години затвор.
Покрај него а затворска казна од четири години беше осудена поранешната министерка за внатрешни работи Гордана Јанкулоска. Највисоки казни од по 15 години затвор добија двајцата избегани контраразузнавачи од т.н. Петта управа на тогашната УБК, Никола Бошковски и Горан Грујовски.
Во случајот беа обвинети вкупно 11 лица, кои со првостепената пресуда, која Апелација сега ја укина, беа осудени на вкупно 55 години затвор и 10 години условен затвор.
*Реакции во врска со укинувањето на пресудата:
- Пендаровски шокиран од одлуката на Апелација за „Таргет-Тврдина“: Ова е пораз за правната држава
- Ковачевски за „Таргет-Тврдина“: Вчерашниот ден беше тежок да се проголта, ден на пораз на правната држава
- Грковска со остра реакција за укинувањето на пресудата за „Таргет-Тврдина“, ја повика Апелација детално да ја образложи одлуката
- Ако судиите од Апелација немаат аргументи за „Таргет-Тврдина“, ќе бидат именувани и засрамени од ЕК, смета Османи
- Спасовски: Укинувањето на пресудата за „Таргет-Тврдина“ е понижувачка и упатува на губење на довербата на граѓаните во системот
- Заев: Ги повикувам сите надлежни од правосудството да не дозволат да застарат делата на Мијалков
- Димитров: Срам за судството, одлуката на Апелација за „Таргет-Тврдина“ е резултат на клиентелизмот
- ВМРО-ДПМНЕ за одлуката на Апелација: Одговори да се бараат кај Ковачевски и неговите сопартијци кои градеа кариери на случајот поврзан со Мијалков
- Таравари за „Таргет-Тврдина“: Државата капитулира пред криминалот, единствена надеж е шок-терапија од САД