Судскиот совет има надлежност да ја констатира состојбата за текот на постапката во смисла на ажурно постапување и дали одлуката била донесена од страна на пензиониран судија, порачува претседателката Дамева
По укинувањето на пресудата за случајот „Таргет-Тврдина“ од страна на Апелацискиот суд Скопје и враќање на предметот на повторно судење пред Основниот кривичен суд, се огласи и новата претседателка на Судскиот совет, Весна Дамева, со најава дека ова тело ќе го преиспитува постапувањето на судиите.
Во писмената изјава до медиумите Дамева посочува дека Судскиот совет не може да ја оценува одлуката на Апелација, но може да ја констатира состојбата за текот на постапката.
„Со оглед дека вчера дознав од медиумите за конкретниот случај, во понеделник во рамки на моите овластувања веднаш ќе преземам дејствија, а Судскиот совет во рамките на своите законски надлежности ќе го испита конкретниот случај и за преземените дејствија и констатираната фактичка состојба ќе бидете навремено известени. Укажувам дека Судскиот совет нема надлежност да преиспитува, односно да оценува судска одлука, но има надлежност да ја констатира состојбата за текот на постапката во смисла на ажурно постапување и дали одлуката била донесена од страна на судија на кој му престанал мандатот поради исполнување на услови за старосна пензија“,
вели Дамева во писмената изјава.
Одлуката за укинување на пресудата за најважниот предмет од аферата со масовното прислушување, го донесе петчлен судечки совет од Апелација на чело со судијата Јани Нича. Судија известител беше Енвер Беџети, а останатите тројца членови беа: Ѓоко Ристов, Тања Милева и Лидија Чачева.
Соопштение за укинување на пресудата беше објавено вчера, а порталот СДК.мк објави дека судијката Лидија Чачева била пензионирана на 7 декември. Телевизија Телма, пак, објави дека одлуката за „Таргет-Тврдина“ била донесена на 5 декември односно два дена пред Судскиот совет да ја пензионира Чачева. Меѓутоа, тука се поставува и прашањето зошто Апелација чекаше до 16 декември за да објави соопштение.
Вчерашната објава од второстепениот суд предизвика бура од реакции кај граѓаните, а со остри коментари излегоа и актуелни и поранешни функционери. Реагираа и опозициските партии.
*Поврзани вести:
- Мијалков куртули од 12 години затвор за „Таргет-Тврдина“: Апелација ја укина пресудата и го врати предметот на повторно судење
- Пендаровски шокиран од одлуката на Апелација за „Таргет-Тврдина“: Ова е пораз за правната држава
- Грковска со остра реакција за укинувањето на пресудата за „Таргет-Тврдина“, ја повика Апелација детално да ја образложи одлуката
- Ако судиите од Апелација немаат аргументи за „Таргет-Тврдина“, ќе бидат именувани и засрамени од ЕК, смета Османи
- Спасовски: Укинувањето на пресудата за „Таргет-Тврдина“ е понижувачка и упатува на губење на довербата на граѓаните во системот
- Заев: Ги повикувам сите надлежни од правосудството да не дозволат да застарат делата на Мијалков
- Димитров: Срам за судството, одлуката на Апелација за „Таргет-Тврдина“ е резултат на клиентелизмот
- ВМРО-ДПМНЕ за одлуката на Апелација: Одговори да се бараат кај Ковачевски и неговите сопартијци кои градеа кариери на случајот поврзан со Мијалков
- Таравари за „Таргет-Тврдина“: Државата капитулира пред криминалот, единствена надеж е шок-терапија од САД