Затоа СДСМ ќе ги вложи сите напори да победи на следните избори во 2024 година и да ги спречи учениците на Никола Груевски да се вратат на власт и да ја заробат повторно државата, рече лидерот на СДСМ
Премиерот и лидер на СДСМ, Димитар Ковачевски, вечерва на националната трибина на партијата „Силно и одлучно за иднината“ ја искоментира вчерашната одлука на Апелацискиот суд Скопје да ја укине пресудата за масовното прислушување во случајот „Таргет-Тврдина“, оценувајќи дека тоа било ден на пораз на правната држава.
„Вчерашниот ден беше тежок да се проголта и јас сум навистина разочаран. Ден на пораз на правната држава и уште еден доказ за ниската доверба на граѓаните во правосудните органи. Судството мора да најде начин да е поефикасно и да сработи многу подобро и побрзо во интерес на правдата и граѓаните. Секогаш кажувам, и вечерва ќе повторам – судството е независно и никогаш нема да се мешам во ниту еден процес. Судницата не е место за решавање на политички проблеми. Ако некој се плаши од враќање на стариот режим, одговорот лежи на избори. Затоа СДСМ ќе ги вложи сите напори да победи на следните избори во 2024 година и да ги спречи учениците на Никола Груевски да се вратат на власт и да ја заробат повторно државата“,
рече Ковачевски.
Принципите на еднаквост, правда и солидарност, посочи тој, мора да се спроведуваат и во економијата и во демократскиот свет, но и во борбата против криминалот и корупцијата. Во оваа борба, рече лидерот на СДСМ, мора уште многу да се прави и сработи бидејќи тоа е она што го ветиле.
Апелацискиот суд Скопје вчера соопшти дека ја укинал пресудата за „Таргет-Тврдина“ – главен предмет од аферата за масовното нелегално прислушување кое опфати околу 20 000 граѓани. Во краткото објаснување од второстепениот суд посочија дека судиите констатирале дека првостепениот суд при постапувањето по овој предмет сторил суштествени повреди на одредбите од Законот за кривичната постапка кои се од апсолутен карактер, а на кои овој суд внимава по службена должност.
Судиите кои ја донесоа ваквата одлука се: Јани Нича – претседател на петчлениот совет; Енвер Беџети – судија известител; Ѓоко Ристов, Тања Милева и Лидија Чачева.
Во случајот со првостепената пресуда од Основниот кривичен суд Скопје, што сега Апелација ја укина, на 12 години затвор беше осуден поранешниот шеф на УБК, Сашо Мијалков. Ексминистерката за внатрешни работи Гордана Јанкулоска на четири години, а казни од по 15 години затвор добија двајцата избегани контраразузнавачи од т.н. Петта управа на тогашната УБК, Никола Бошковски и Горан Грујовски.
Во случајот беа обвинети вкупно 11 лица, кои со првостепената пресуда беа осудени на вкупно 55 години затвор и 10 години условен затвор.
*Поврзани вести:
- Мијалков куртули од 12 години затвор за „Таргет-Тврдина“: Апелација ја укина пресудата и го врати предметот на повторно судење
- „Таргет-Тврдина“: Судскиот совет не може да ја оценува одлуката на Апелација, но ќе го „чешла“ постапувањето на судиите
- Пендаровски шокиран од одлуката на Апелација за „Таргет-Тврдина“: Ова е пораз за правната држава
- Грковска со остра реакција за укинувањето на пресудата за „Таргет-Тврдина“, ја повика Апелација детално да ја образложи одлуката
- Ако судиите од Апелација немаат аргументи за „Таргет-Тврдина“, ќе бидат именувани и засрамени од ЕК, смета Османи
- Спасовски: Укинувањето на пресудата за „Таргет-Тврдина“ е понижувачка и упатува на губење на довербата на граѓаните во системот
- Заев: Ги повикувам сите надлежни од правосудството да не дозволат да застарат делата на Мијалков
- Димитров: Срам за судството, одлуката на Апелација за „Таргет-Тврдина“ е резултат на клиентелизмот
- ВМРО-ДПМНЕ за одлуката на Апелација: Одговори да се бараат кај Ковачевски и неговите сопартијци кои градеа кариери на случајот поврзан со Мијалков
- Таравари за „Таргет-Тврдина“: Државата капитулира пред криминалот, единствена надеж е шок-терапија од САД