Согласно информациите во ЦУК, екипа од Центарот за јавно здравје во Тетово е на терен за да ја испитаат водата за пиење, а резултатите ќе бидат готови за неколку дена
Пожарот во магацин на фабрика за бои и лакови во тетовското село Фалише е ставен под контрола, информираат од Центарот за управување со кризи (ЦУК).
Од магацинот, како што велат од ЦУК, сè уште излегува чад, но на местото има екипа пожарникари од Територијалната противпожарна единица од Тетово за да ја контролира ситуацијата. Исто така, од ЦУК велат на терен има и полициски екипи кои ја обезбедуваат локацијата.
Согласно информациите во ЦУК, екипа од Центарот за јавно здравје во Тетово е на терен за да ја испитаат водата за пиење, а резултатите ќе бидат готови за неколку дена. Сепак, од ЦУК велат дека според информациите што ги имаат од Центарот за јавно здравје од Тетово, состојбата на водата ќе биде во ред, бидејќи бушотината од која се црпи вода имала 50 метри длабочина.
Пожарот во фабриката избувна вчера околу 10:30 часот, а од снимките кои беа објавени може да се види густ црн чад и пламен како излегуваат од објектот на магацинот, во кој изгореа голема количина бои, лакови и други хемикалии.
Од Центарот за јавно здравје, чии екипи беа на терен, препорачаа граѓаните да останат дома и да не излегуваат без потреба бидејќи согорувањето вакви материи создава отровни и штетни гасови во воздухот.
Поради големите количини на хемикалии што изгореа во пожарот, првиот човек на Центарот за управување со кризи (ЦУК), Стојанче Ангелов, изјави дека од Одделот за биолошко и хемиско оружје во Армијата е побарано да се испита колкаво е загадувањето.
Засега нема информации за обемот на загадување предизвикан од согорувањето на опасните материи.
Покрај тетовските, во гаснењето на пожарот учествувале и пожарникари од Скопје, Гостивар, Велес и Куманово.