До мај годинава во земјата се забележани 4,77 милиони сомнителни случаи на ковид, но нема пријавено нови од 29 јули, а на 11 август лидерот Ким Џонг Ун прогласи победа над вирусот
Две недели откако Северна Кореја прогласи победа над коронавирусот, земјата пријави четири сомнителни случаи во провинција во близина на границата со Кина, објави Си-ен-ен.
Областа каде што беа пронајдени сомнителните случаи беше веднаш ставена под карантин, објави во вторникот државната новинска агенција КЦНА.
„Четири случаи на треска, за кои постои сомневање дека се предизвикани од малигна епидемија, се откриени во провинцијата Рајанганг на 23 август“.
објави КЦНА цитирајќи го Државниот штаб за спречување епидемии.
Северна Кореја има ограничени можности за тестирање и сомнителните инфекции на ковид ги нарекува „случаи со треска“.
Земјата официјално ги потврди првите случаи на ковид-19 во мај, кога епидемијата ја нарече „експлозивна“ и нагласи дека таа претставува „голема национална вонредна состојба“.
Оттогаш во земјата се забележани 4,77 милиони сомнителни случаи, но нема пријавено нови од 29 јули, а на 11 август лидерот Ким Џонг Ун прогласи победа над вирусот.
Сепак, многу експерти, вклучително и оние од Светската здравствена организација, се сомневаа во ваквите тврдења.
Еден извор на скептицизам е стапката на смртност, која за многу експерти изгледа невообичаено ниска, особено со оглед на тоа што се смета дека мнозинството од населението не е вакцинирано.
Дваесет и петмилионската земја официјално пријави 74 смртни случаи, а КЦНА ова го нарече „чудо без преседан“.
Земјата, исто така, се пофали дека преку ПЦР-тестови на примероци од вода земени во пограничните области развила нови методи за откривање на вирусот и други болести, вклучително и мајмунски сипаници, пишува Ројтерс
Северна Кореја, исто така, вели дека овие резултати се постигнати благодарение на способноста да изолира цели области, како и интензивните медицински проверки и, како што Ким Џонг Ун го нарече, „поволниот социјалистички систем во корејски стил“.
Во известувањето за најновите сомнителни случаи, КЦНА нагласи дека немало лица заразени со „малигната епидемија“ откако ширењето на вирусот било ограничено во земјата.
Се вели дека антиепидемиски тимови биле мобилизирани да ги истражат случаите во најновото „избувнување на треска“.
Ваквите тврдења на Пјонгјанг не можат да се потврдат поради отсуство на независни податоци во земјата, се вели во текстот на Си-ен-ен.
Сепак, неодамнешните бројки од трговската размена на земјата покажуваат дека, и покрај наводна победа над вирусот, Северна Кореја од Кина во јули увезла производи за превенција и контрола на ковид, вклучувајќи повеќе од еден милион маски за лице и 15 000 пара гумени ракавици.