Навлегувањето на ковид-19 во редовите на новоизбраните пратеници на ДУИ (позитивен е и Арбер Адеми) го доведува во прашање и мнозинството од 61 глас за избор на идниот спикер
Досегашниот претседател на парламентот би можел и во отсуство да го потпише решението за свикување на првата седница на 10. Собрание, ама прашање е дали ќе може да претседава со неа
Пред да биде објавена информацијата за хоспитализирањето на Џафери, од Владата потврдија дека тој ќе учествува на централната манифестација за одбележување на Илинден на Мечкин Камен во Крушево
Веста за хоспитализацијата на претседателот на парламентот во заминување Талат Џафери ги наруши подготовките за конститутивната седница на новиот парламент.
Првично, 4 август се посочуваше како најсигурен термин за одржување на конститутивната седница, со оглед на тоа што тоа е првиот работен ден по илинденските празници, а воедно и последен термин до кој Џафери, како претседател на досегашниот собраниски состав, може да ја закаже првата седница на новото Собрание, како што е предвидено во Уставот, во рок од 20 дена од завршувањето на изборите што годинава се одржаа на 15 јули.
И вицепремиерот и портпарол на ДУИ, Бујар Османи, вчера го најави 4 август како можен датум за одржување на конститутивната седница на парламентот, но тоа беше пред информацијата за влошената здравствена состојба на Џафери, за што, веројатно, не биле запознаени ниту во Владата, од каде што и денеска потврдија дека првиот парламентарец годинава за Илинден ќе биде во Крушево.
Од Владата предмалку ни изјавија дека немаат известување за здравствената состојба на Џафери. Но посочуваат дека на следната седница – в понеделник или во вторник, ако има потреба, ќе треба да се смени одлуката за одбележување на Илинден, доколку здравствената состојба на претседателот на парламентот не дозволува тој да присуствува на манифестацијата на Мечкин Камен.
Иако се појавија информации дека Џафери е пуштен од болница, во секој случај е прашање дали тој ќе биде во ситуација да претседава со конститутивната седница, како што се планираше, со оглед на тоа што повторно е избран за пратеник, како носител на кандидатската листа на ДУИ во петтата изборна единица.
Пред распишувањето на изборите, Џафери изјавуваше дека, и покрај тоа што не е сменет собранискиот Деловник, тој може да гарантира дека овој пат првата седница на новиот парламент ќе помине во најдобар ред. Односно дека нема да дозволи да случи нешто слично како при неговиот избор на чело на законодавниот дом – на 27 април 2017 година.
Џафери, како претседател на досегашниот собраниски состав, единствен може да ја закаже првата седница на новото Собрание, а тоа, според проценките во парламентот, би можел да го направи и во случај да биде во самоизолација, како суспектен на ковид-19. Во таква ситуација тој би требало само да го потпише решението за одржување на седницата, но потоа би се одело на „резервно сценарио“, односно, до изборот на нов спикер, со седницата би претседавал највозрасниот меѓу новоизбраните пратеници или некој од следните според возраста.
Доколку, пак, досегашниот претседател на парламентот не ја закаже седницата, останува можноста пратениците сами да се соберат на 21 ден од изборите и да го конституираат парламентот.
Техничката влада, во изминатиот период, главно, заседава онлајн, поради ситуацијата со ковид-19, а во два наврати премиерот Оливер Спасовски, како и дел од министрите беа во самоизолација.
Сепак, ситуацијата со парламентот е поспецифична, со оглед на бројноста и потребната административна логистика, а посебно поради тесниот распоред на сили по изборите. Поради тоа, има стравувања дека евентуалните нови случаи на ковид-19 во редовите на новоизбраните пратеници или ако има потреба за нивна самоизолација, а со оглед на проценките на лекарите дека по изборите е можно да се појават нови кластери на зараза, би можеле да го доведат во прашање и мнозинството од 61 глас, што ќе биде потребно за избор на идниот претседател на Собранието, а потоа и за избор на новата влада.
Од конститутивната седница би можело да отсуствува и досегашниот министер за образовани Арбер Адеми, кој е избран за пратеник на ДУИ, а кој вчера објави дека е позитивен на коронавирусот.
Министерот за економија Крешник Бектеши, кој беше често во придружба на Џафери за време на кампањата вчера, исто така објави дека е позитивен на ковид-19.
Ден пред гласањето на 15 јули, се проширија информации дека позитивен на коронавирусот е кандидатот на ДУИ за премиер Насер Зибери. Информацијата која поттикна сомнежи дека можеби ќе има потреба барем половина од раководството на ДУИ да оди во изолација и да не може да учествува во гласањето следниот ден, беше демантирана неколку часа откако проструи низ етерот.