При евентуално отсуство на Џафери, на Стојан Миланов од СПМ, како највозрасен пратеник, би му припаднала обврската да претседава со првата седница на новото Собрание. Следен според возраста е Илија Николовски од коалицијата на СДСМ
Здравствената состојба на Талат Џафери е стабилна, но потребен му е одмор, со оглед на набиената агенда во изминатиот период за време на изборите, информираат од Собранието, неколку дена откако досегашниот претседател на парламентот беше хоспитализиран на Клиниката за инфективни бoлести и фебрилни состојби.
„Здравствената состојба на претседателот на Собранието е стабилна. Со оглед на интензивните активности што ги имаше во текот на изборната кампања, по препорака на лекарите, неопходен му е одмор и мирување“,
велат од кабинетот на Џафери, посочувајќи дека тој неколку пати за кратко време се тестирал за присуство на ковид-19, ама резултатите се негативни.
Сепак, од кабинетот на Џафери нема одговор дали досегашниот спикер ќе биде во можност да ја закаже конститутивната седница на новиот собраниски состав и евентуално да претседава со неа. Доколку Џафери не закаже седница до 4 јули, што е дваесеттиот ден од одржувањето на изборите, тогаш Уставот предвидува можност новоизбраните пратеници сами да се соберат на 21 ден (5 август) и да го конституираат новиот состав.
„Сѐ ќе биде според рокот, како што предвидуваат Уставот и Деловникот. Ќе информираме кога ќе биде закажана седницата“,
велат од кабинетот на Џафери.
Доколку Џафери, кој е избран повторно за пратеник како носител на листата на ДУИ во петтата изборна единица, не претседава со конститутивната седница, тогаш таа обврска би му припаднала на највозрасниот пратеник или на некој од следните по возраст.
Не е исклучено, при евентуално отсуство на Џафери, со конститутивната седница, до изборот на претседател на 10. собраниски состав, да претседава Стојан Миланов од Социјалистичката партија, која е во коалиција со ВМРО-ДПМНЕ. Врз основа на биографиите на новоизбраните пратеници, Миланов (72), за кого ова е нов пратенички мандат, е „лоциран“ за највозрасен меѓу парламентарците што беа избрани на 15 јули.
Следен според возраста е Илија Николовски (72) од Партијата на пензионерите, за кого ова е исто така нов мандат од листата на коалицијата на СДСМ.
Пред истекот на последните рокови за одржување на конститутивната седница, Џафери, како што е уредено со владината одлука за одбележување на Илинден, на 2 август треба да учествува на централната манифестација во Крушево. Последната информација од Владата, која заседава и денеска, беше дека во текот на оваа недела би се сменила одлуката за одбележувањето на Илинден, доколку здравствената состојба на Џафери не му дозволува да говори на Мечкин Камен.
Освен влошената здравствена ситуација на Џафери, инфициран со ковид-19 е досегашниот министер за образование Арбер Адеми, кој, исто така, е избран за пратеник. Од тој аспект, соговорници од Собранието велат дека, ако е се обезбедат услови парламентарците (барем дел од нив) да можат да работат и онлајн додека трае епидемијата, тогаш често би можело да има проблеми со кворумот, како и со обезбедување 61 глас за одредени одлуки, а со оглед на тесниот распоред на сили во новиот законодавен дом. Така на пример, уште во текот на конститутивната седница би требало да се обезбедат најмалку 61 глас за избор на претседателот на 10 парламентарен состав.