Собранието се подготвува за работа според протоколите за заштита од ковид-19, а спикерот Џафери изјави за „360 степени“ дека е можно да ја закаже конститутивната седница пред крајниот датум за тоа – 5 август
Наместо во салата за пленарни седници, каде што безмалку три децении заседаваат сите девет досегашни состави на македонскиот парламент, новиот пратенички состав, кој ќе биде избран на 15 јули, ќе ја одржи конститутивната седница во новата сала. Десеттиот собраниски состав ќе почне да заседава во салата со куполи на последниот кат во собраниската зграда, за да се обезбеди физичка дистанца меѓу присутните, согласно мерките за заштита од коронавирусот.
Претседателот на парламентот во заминување, Талат Џафери, потврди за „360 степени“ дека собраниските служби веќе го подготвуваат „теренот“ за работа на идниот парламент во услови на епидемија.
„Во салата со куполите има 204 седишта, а може да се додадат и нови столчиња за да се обезбеди поголема дистанца меѓу пратениците. Во прво време, додека трае епидемијата, парламентот би заседавал во оваа сала, со тоа што гласањето би било рачно, затоа што електронскиот систем на гласање е приспособен за пленарната сала. Рачното гласање ќе одземе време, ама мора да се приспособиме на моменталната ситуација“,
ни изјави Џафери.
Тој објаснува дека седниците на комисиите ќе се одржуваат главно во големата сала „Борис Трајковски“, исто така за да се обезбеди физичка дистанца. Доколку пак има потреба од паралелно одржување на повеќе комисии, тогаш ќе се приспособат и другите поголеми сали и ќе се инсистира на седницата да учествуваат само пратеници кои се членови на одредено работно тело.
Исто така, ќе бидат отворени и сите влезови на парламентот, под соодветно обезбедување, за да се овозможи растојание и при разминувањето на пратениците и собраниската администрација во ходниците на објектот кој е е во кружна форма и овозможува движење од различни правци. Ако има потреба, вели Џафери, би можела да се направи и дополнителна јавна набавка на заштитна опрема, односно на маски и средства за дезинфекција.
Деветтиот собраниски состав се распушти на 16 февруари годинава, односно пред почетокот на корона-кризата во земјава, така што не заседаваше во периодот на епидемијата, која сè уште трае.
Џафери синоќа потпиша ново решение за изборите, со кое го измени решението за избори на 12 април и, практично, ги презакажа парламентарните избори за 15 јули, откако лидерите на СДСМ и на ВМРО-ДПМНЕ постигнаа договор за тој датум.
Според тоа, конститутивната седница на „јубилејниот“ 10. собраниски состав би требала да се одржи некаде до 5 август. Конститутивната седница треба да ја закаже Џафери, како претседател на претходниот собраниски состав, а кој сега е носител на кандидатската листа на ДУИ во петтата изборна единица. Тој уверува дека ќе ја организира конститутивната седница според сите прописи и верува дека сè ќе помине во најдобар ред.
Џафери вели дека би било добро и ако конститутивната седница може да се одржи пред крајниот термин за тоа. Но, нагласува, тоа зависи од евентуалните прегласувања по 15 јули, а ќе треба да се координира и со партиите кои ќе освојат пратенички мандати.
„Последниот рок за одржување на конститутивната седница би бил околу 5 август – 20 дена по изборите. Но сметам дека не мора да се чека толку. Јас треба да ја закажам седницата, а според Деловникот можам и да претседавам со неа, така што ќе преземам сè што е потребно за таа да помине во најдобар ред“,
вели Џафери.
Кампањата за 10. парламентарни избори почнува на 24 овој месец и, според најавите, ќе се реализира, исто така, под посебни мерки за заштита од ковид-19, односно без поголеми собири и главно по електронски пат. И гласањето годинава ќе биде многу поразлично од претходно, односно ќе почне уште на 13 јули, а ќе заврши на 15 јули во 21, наместо во 19 часот.