Има оптимизам и треба да има оптимизам во однос на решавање на прашањето со Бугарија, изјави премиерот Зоран Заев, вечерва во интервју за Сител, по вчерашните разговори на шефот на дипломатијата Бујар Османи и вицепремиерот Никола Димитров со министерката за надворешни работи на Бугарија, Екатерина Захариева во Берлин.
По денешиот разговор на германската канцеларка Ангела Маркел со бугарскиот премиер Бојко Борисов на оваа тема, премиерот Заев најави дека е планирано утре тој да разговара со Меркел.
Тој рече дека е оптимист за решавање на прашањето што го наметна Бугарија, истакнувајќи дека оптимизам гледа и во обраќањето на Захариева, но и во Фејсбук – статусот на Борисов.
Во однос на споменатата декларација од страна на Бугарија, Заев појасни дека се работи за изјава односно нота до Бугарија и до ЕУ дека Република Северна Македонија и Северна Македонија се едно исто и реферираат на политичкиот субјект на државата – Република Северна Македонија, притоа со нашиот Устав е гарантирано дека немаме територијални претензии према никој од соседите, ниту кон Бугарија.
Што се однесува за името на државата и јазикот, Заев рече дека во овој момент може да се најде решение за сите дилеми и отворени прашања.
„Во однос на јазикот да продолжиме со билатералната спогодба. За нас македонскиот јазик е согласно Уставот и бугарскиот јазик е согласно нивниот Устав. ЕУ го признава македонскиот јазик, го има веќе во преводите на состаноците накои се одржуваат низ европските тела и институции“, рече Заев, додавајќи дека постои можност да се постигне договор затоа што денеска бугарската страна јасно декларира оти ја признава реалноста, постоењето на македонскиот народ и македонскиот јазик и сега се зборува за историјата.
Тој истакна дека е добредојдена помошта од Германија и оцени дека даваат резултати честите комуникации помеѓу работните групи и минситрите од двете страни, бидејќи се работи за две пријателски земји. Потсети дека Бугарија го врати фокусот на Западен Балкан во ЕУ и ја има желбата да продолжи европеизацијата на Западен Балкан.
„Сега сме ние на ред, Република Северна Македонија треба да ги отвори поглавјата преку првата меѓувладина конференција. Се трудам да има целосно разбирање. Двете страни сакаат да има решение“,
рече вечерва Заев.