Притисоците на кои се жалат вработените во „Водовод и канализација“ од страна на новиот директор денеска се причина за партиски обвинувања кон Арсовска и барање таа да се вразуми. Од нејзина страна, пак, одговорот е дека на луѓе што одат на работа, а не работат чесно не смее да им се дава шанса да го оштетуваат буџетот. Градоначалничката денеска обелодени и дека Финансиската полиција и ОЈО за гонење организиран криминал и корупција веќе се влезени во Јавното претпријатие
Изминатите денови во скопски „Водовод и канализација“ врие како во тава. Работната недела почна со разрешување на директорот Златко Перински, кого градоначалничката Данела Арсовска го обвини за самоволие и изрази сомнежи за влијание во милионски тендер за пречистителна станица. Наредниот ден на негово место Арсовска го назначи Марјан Митовски. Од тогаш не престануваат случувањата околу ова јавно претпријатие. Обвинувања стигнуваат од вработените, од партијата на власт, но и од ВМРО-ДПМНЕ, чиј кадар беше Перински како дел од соработката и поддршката што ѝ ја даваа на Данела Арсовска.
Последното соопштение стигна денеска во кое се вели дека новоназначениот в.д. директор на Јавното претпријатие „Водовод и канализација“ врши притисок и тортура врз вработените. Ова се обвинувањата што Синдикатот на работниците од угостителството, туризмот, комунално-станбеното стопанство, занаетчиството и заштитните друштва (СУТКОЗ) при ССМ ги испрати во денешниот допис до медиумите.
„Ваквиот однос на новиот в.д директор може да доведе до колапс на водоснабдителниот и канализацискиот систем во Скопје поради тоа што квалификуваните работници се упатуваат да извршуваат други работни задачи, а дел од нив ги губат и своите работни места“,
велат од СУТКОЗ.
Во соопштението од СУТКОЗ се вели дека вработените во ЈП „Водовод и канализација“ Скопје, од 7 часот утринава се соочуваат со тортура од страна на новото раководство на јавното претпријатие.
„Повеќе од 1/3 од вкупниот број на вработени во претпријатието се засегнати со губење на работните места и се незаконски распоредувани на други работни места со задолженија без право на приговор и без право на жалба што е спротивно и на Закон и на колективен договор и на Уставот на државата“,
се додава во соопштението.
Ваквите постапки, според синдикатот, се грубо кршење на работничките права за разлика од, како што наведуваат, периодот кога директори биле Душко Весковски и Златко Перински кога се почитувал колективниот договор.
Синдикатот вчера побара од градоначалничката на Град Скопје да ја преиспита одлуката на новиот в.д. директор на „Водовод и канализација“ за прекин на договорите за вработување на повеќе од 100 вработени и за прераспределување на дел од вработените.
За состојбата во „Водовод и канализација“ денес со партиски соопштенија се огласија и СДСМ и ВМРО-ДПМНЕ.
Од ВМРО-ДПМНЕ велат дека градоначалничката Данела Арсовска своите фрустрации не треба да ги истура врз недолжни луѓе вработени во ЈП „Водовод и канализација“ – Скопје.
„Најавата за отпуштање на 100 лица, од кои дел се наследени од претходното раководство и работат чесно веќе две, па и повеќе години е крајно бесмислен и неразумен потег. Арсовска неформално позната по реченицата ‘од утре да го нема’ нареди да ги нема 100 вработени во ЈП „Водовод и канализација“, оставајќи ги без работа и без егзистенција. Можеби нервозата на градоначалничката е резултат на извештајот на ЕИБ, кој ги негира нејзините обвинувања и потврдува дека тендерската постапка за изградбата на пречистителната станица за отпадни води во Скопје е водена правилно. Но, нејзините лични чувства не смеат да бидат причина да им се осветува на вработените во јавното претпријатие“,
велат од ВМРО-ДПМНЕ.
Впрочем, додаваат од таму, за тоа дека Арсовска не е во право говорат и апелите на гранковите синдикати при ССМ, особено ако се има предвид економската состојба во која се наоѓа државата и егзистенцијата на 100 семејства од платата во ЈП „Водовод и канализација“.
„Патем инспекцискиот надзор од пред два месеци направен од страна на Државниот инспекторат за труд во јавното претпријатие увидел кристално чиста состојба, што само покажува дека овие 100 лица совесно и одговорно си ја вршеле својата работа. Оттука сметаме дека Арсовска треба да се вразуми и своите битки да не ги води врз грбот на граѓаните. Скопје и граѓаните од неа очекуваат работа, проекти и модерно Скопје, а не нервозни реакции. Таа треба да ги исполнува своите ветувања за кои е избрана и за кои е платена од народни пари“,
нагласуваат од ВМРО-ДПМНЕ.
Од партијата денес и на прес-конференција ја повикаа Арсовска се вразуми, и во духот на успешен менаџер, за каков што се претставуваше, да се воздржи од вакви нагли и непромислени потези.
„Луѓето заслужуваат да си ја задржат работата која си ја вршат со посветеност и чесност. Градоначалник, запрете ја постапката. Заборавете на реваншизам кон недолжни работници. Посветете се на реализација на проектите“,
порача Стефан Андоновски, член во Советот на Град Скопје и меѓународен секретар на ВМРО-ДПМНЕ.
Од владејачкиот СДСМ, пак, бараат Христијан Мицкоски да каже, која е неговата улога за тендерот од 136 милиони евра?
„Криминалната матрица на ВМРО-ДПМНЕ и Мицкоски не се менува. Христијан Мицкоски се скара со Данела Арсовска само заради пари, тендери, влијанија и бизнис интереси. Тендер вреден 136 милиони евра е причина за кавгата помеѓу кадрите на Мицкоски. Сега Мицкоски пред граѓаните треба да каже, која е неговата улога во тендерот вреден 136 милиони евра за пречистителната станица?“,
се вели во соопштението од СДСМ.
Од партијата велат дека по сите јавни обвинувања за наводен криминал треба да реагираат и надлежните институции и да го истражат овој случај.
„Ниту граѓаните не ги интересираат односите на Арсовска и Мицкоски, дали им се нарушени, дали со тоа кријат нешто друго или не. Скопјани очекуваат развој на градот, реализација на ветените проекти кои никаде ги нема. Тоа, со ваква градска власт, за жал не е возможно“,
додаваат од СДСМ.
ВМРО-ДПМНЕ и Груевски, додаваат од СДСМ, преку криминалниот проект „Скопје 2014“ приредија катастрофа, сега Мицкоски преку Скопје 2024 сака да му приреди нова катастрофа на градот.
За низата обвинувања од страна на вработените и партиите, градоначалничката Данела Арсовска, утрово за емисијата „Студио 10“ на ТВ 24 рече дека од вчера во јавното претпријатие „Водовод и канализација“ – Скопје се врши проверка на работата од страна на Управата за финансиска полиција и Основното јавно обвинителство за организиран криминал и корупција.
„Според мои информации, од вчера е влезена финансиска полиција и ОЈО за организиран криминал. Си постапуваат по допрен глас“,
рече Арсовска на прашањето дали институциите го испитуваат случајот по оставката на директорот Златко Перински за наводно своеволие во тендерот за пречистителна станица за повеќе од 100 милиони евра.
Таа додаде дека нема да се предомисли и дека од денеска на голем број вработени во ЈП „Водовод и канализација“ ќе им заврши договорот за работа и оти тие стотина луѓе биле вработени за само неколку месеци.
„Луѓе кои одат на работа, а не си ја работат чесно, не смее да им се дава шанса да го оштетуваат буџетот. До сите јавни претпријатија беше испратена ревизија и побаравме отчетност. Да видиме колку луѓе се нововработени и работат од дома“,
порача Арсовска.
Градоначалничката порача дека нема да си даде оставка и дека, како што вели, ќе продолжи да работи без саботажи.
„Не, апсолутно, за оставка. Имам уште три и пол години без саботажи. Останува совеста на советниците на Град Скопје и нивниот разум да ги одржат проектите, во спротивно, нивна е одговорноста. Секој може да одлучи во чиј интерес сака да работи, тие не се мои проекти, тие се на граѓаните“,
изјави Арсовска.