Синдикатот на работниците од угостителството, туризмот, комунално-станбеното стопанство, занаетчиството и заштитните друштва (СУТКОЗ) бара од Арсовска да ја преиспита одлуката за прекин на договорите за вработување на повеќе од 100 вработени во ЈП „Водовод и канализација“ и воедно се спротивставува и на незаконските прераспоредувања на работниците во претпријатието со едностран акт на директорот
Во услови на светска економска и енергетска криза, градоначалничката Данела Арсовска да не дозволи над 100 фамилии да останат на улица.
Ваква е реакцијата на Синдикатот на работниците од угостителството, туризмот, комунално-станбеното стопанство, занаетчиството и заштитните друштва (СУТКОЗ) при ССМ откако скопската градоначалничка најави оти ќе се ревидира зошто ексдиректорот на Јавното претпријатие „Водовод и канализација“, Златко Перински, за неколку месеци вработил 100 лица во претпријатието.
СУТКОЗ бара од Арсовска да ја преиспита одлуката за прекин на договорите за вработување на повеќе од 100 вработени во ЈП „Водовод“ и воедно се спротивставува и на незаконските прераспоредувања на работниците во претпријатието со едностран акт на директорот.
„СУТКОЗ и ССМ секогаш се залагаат и се борат договорите и решенијата за прераспоредување да бидат законски со двостран акт – договори за вработување помеѓу работниците и работодавачите и затоа бараме итна средба со в.д директорот на ЈП ‘Водовод и канализација’, како и со градоначалничката на Град Скопје за да спречиме дополнителни штети кон работниците во оваа светска, економска и енергетска криза и неизвесност“,
се вели во соопштението.
Реакцијата на СУТКОЗ доаѓа откако од Град Скопје информираа дека вонредната ревизија на вработувањата што ги склучил поранешниот директор на ЈП „Водовод и канализација“ Скопје, Златко Перински, покажала дека речиси 100 лица се нововработени за неколку месеци. Во таа насока, оттаму посочија дека ќе се ревидира зошто Перински спровел 100 вработувања во претпријатието во изминатите месеци.