Од опозициската партија не ги коментираат наводите на Обвинителството, според кои претходниот партиски лидер, кој е сега во бегство во Будимпешта, со пари од донации за ВМРО-ДПМНЕ си купувал плацови на Водно
Шефицата на Обвинителството за организиран криминал Вилма Русковска не може да биде непристрасна во случаи поврзани со ВМРО-ДПМНЕ и со личности поврзани со партијата, оценуваат од опозициската партија по отворање на истрагата „Плацови на Водно“, во која првоосомничен е експремиерот Никола Груевски, а неговиот кум Ристо Новачевски денеска заврши во притвор како третоосомничен.
„Не може Русковска, која чувствува лутина анксиозност и нетрпение кон ВМРО-ДПМНЕ, како што пишува и во докторски наод, да биде непристрасна во какви било случаи поврзани со партијата или со лица од партијата. Таа единствено може да води политички случаи во корист на власта и под палката на Зоран Заев, така што најдобро би било што поскоро да замине од позицијата јавен обвинител“ ,
велат од ВМРО-ДПМНЕ за „360 степени“.
Од партијата не ги коментираат наводите на Обвинителството, според кои претходниот партиски лидер, кој е сега во бегство во Будимпешта, со пари од донации за ВМРО-ДПМНЕ си купувал плацови на Водно.
Обвинителството, покрај Новачевски, за перење пари ги сомничи и експремиерот Груевски, неговиот братучед Сашо Мијалков, бизнисменот Орце Камчев, неговата мајка Ратка Камчева и Ненад Јосифовиќ. Камчев, Мијалков и Јосифовиќ се осомничени и во „Империја“.
Случајот со плацовите на водно го обелодени актуелниот премиер Зоран Заев, кога, како опозиционер, ги објавуваше снимките од нелегално прислушуваните разговори. Во однос на финансирањето на ВМРО-ДПМНЕ, пак, некогашното СЈО го отвори предметот „Талир“, со кој, во еден дел, е опфатена и изградбата на новото партиско седиште во центарот на Скопје.
Шефицата на Обвинителството за организиран криминал неодамна го изгуби случајот за клевета што го поведе против ВМРО-ДПМНЕ, поради користење на нејзиното име и лик во партиската кампања за годинашниве парламентарни избори. Граѓанскиот суд во Скопје ја отфрли тужбата на Русковска, која бараше отштета од 10 000 евра, кои рече дека планира да ги донира во СОС детското село.
Русковска најави денеска дека ќе го отвори повторно прашањето за екстрадиција на Груевски во земјава откако унгарските власти не го испорачаа ниту за да ја отслужи правосилната затворска казна за „Тенк“, ниту за да учествува во процесот за организацијата на настаните во парламентот на 27 април 2017 година, каде што е меѓу обвинетите заедно со поранешниот претседател на парламентот Трајко Вељаноски.