Ваквата реакција на најголемата опозициска партија доаѓа откако завчера Дирекцијата за технолошко-индустриски развојни зони (ТИРЗ) информира дека го запира извршувањето на договорот за доделување државни пари на компанијата која треба да изгради фабрика за еколошки автомобили во Технолошко-индустриската развојна зона во Тетово
Од Дирекцијата за ТИРЗ, остро реагираа на, како што нагласија, наводите за злоупотреба на јавни средства за проектот „е.Го“. Ниту еден денар јавни пари не се исплатени кон оваа компанија, децидни се од ТИРЗ. Покажавме дека имаме јасни процедури и капацитет да го заштитиме јавниот интерес и средства, додаваат оттаму
По скоро две години ниту почна изградба на фабриката, ни „С“ од стратешка инвестиција, ни 130, ни 720 милиони евра инвестиција, ниту 890 добро платени работни места, ниту 4 000 индиректни работни места, ниту 30 000 произведени електрични автомобили годишно, ни ефект на снежна топка, ни бутур, соопштија од ВМРО-ДПМНЕ. Ваквата реакција на најголемата опозициска партија доаѓа откако завчера Дирекцијата за технолошко-индустриски развојни зони (ТИРЗ) информира дека го запира извршувањето на договорот за доделување државни пари на компанијата која треба да изгради фабрика за еколошки автомобили во Технолошко-индустриската развојна зона во Тетово.
„Но најстрашно е дали и каде заврши најавената државна помош за оваа голема лага. Имено, владата одлучи оваа ‘инвестиција’ да ја поддржи со 35 отсто од вкупната вредност, односно со 42,5 милиони евра народни пари. Медиумите во април месец 2023 објавија дека инвеститорот ‘Некст.Е.Го Мобиле’ добил одобрување на државна помош од 42 585 856 милиони евра согласно извештајот на Комисијата за заштита на конкуренцијата за 2022 година. Дека има нешто сомнително во оваа зделка говори и фактот што за јавноста остана непознат договорот на државата со компанијата инвеститор, бидејќи Владата не овозможуваше увид во целосната содржина на договорот, кој беше потпишан во август 2022 година. Повикуваме надлежните институции детално да го истражат случајот со државната помош за ‘фабриката за електрични автомобили’ во Тетово. Доколку тоа не се направи сега, после изборите и промената на власта ќе се спроведе целосна ревизија на овој таканаречен проект и ќе се провери дали и каде завршил секој денар од народните пари“,
се вели во соопштението на ВМРО-ДПМНЕ.
Од Дирекцијата за ТИРЗ остро реагираа на, како што нагласија, наводите за злоупотреба на јавни средства за проектот „е.Го.“. Ниту еден денар јавни пари не се исплатени кон оваа компанија, децидни се од ТИРЗ. Покажавме дека имаме јасни процедури и капацитет да го заштитиме јавниот интерес и средства, додаваат оттаму.
„Политичката партија ВМРО-ДПМНЕ денес фрли јавен сомнеж врз процедурите и капацитетите за реализација на државната помош, кои засегаат не само еден, туку над 40 договори што ги спроведува Дирекцијата за ТИРЗ. Со ова, се прави непосреден удар не само врз угледот на компаниите корисници на ТИРЗ, туку и врз животниот стандард на близу 20 000 наши сограѓани кои се директно ангажирани во овие компании. Во интерес веднаш да се расчисти со овие сомнежи и обвинувања и намалување на штетата врз луѓето и овие компании, јавно ја покануваме политичката партија ВМРО-ДПМНЕ веднаш и без одлагање да дојде и да направи увид во целокупната документација на проектот и да најде макар еден денар јавни пари исплатени на компанијата“,
се вели во соопштението на Дирекцијата.
Доколку се утврди дека вакви средства не се исплатени, додаваат од Дирекцијата, очекуваме политичката партија да упати јавно извинување за нарушен углед до сите компании што користат поддршка од државата.
„Дирекцијата за ТИРЗ во целиот изминат период навремено и транспарентно ја информира јавноста за сите прашања поврзани со проектот за електрични возила ‘е.Го’ во Тетово. Конкретно, при самото потпишување на договорот презентирани се сите детали за поддршката од државата, а целосен увид во договорот е даден на сите заинтересирани медиуми кои се обратија до Дирекцијата. Во ниту еден момент од наша страна не е одбиен или пренасочен кон друга институција одговор на прашања поврзани со проектот“,
стои во реакцијата.
Дирекцијата за ТИРЗ вчера соопшти дека го запира извршувањето на договорот за доделување државни пари на компанијата која треба да изгради фабрика за еколошки автомобили во Технолошко-индустриската развојна зона во Тетово.
Станува збор за мултимилионски проект кој Владата го најави уште во август 2022 година, како германска инвестиција во земјава.
Запирањето на државната помош за компанијата, според соопштението објавено на официјалната веб-страница на Дирекацијата за ТИРЗ, доаѓа откако компанијата „мајка“ во Сојузна Република Германија поднела барање за несолвентност.
„Дирекцијата за ТИРЗ како застапник на Владата во Договорот за доделување на државна помош со компанијата ‘е.Го’ информира дека се запира извршувањето на Договорот и секоја постапка предвидена за доделување на јавни средства. Запирањето на доделувањето на државна помош следи по добиени јавно достапни информации за поднесено барање за несолвентност на компанијата ‘мајка’ во СР Германија. Барањето е поднесено пред надлежните судови во оваа земја. Со ова, Дирекцијата за ТИРЗ, како застапник на Владата ги активира заштитните механизми во потпишаниот договор, кои ги предвидуваат и овие околности (стечај, ликвидација), како предуслов за запирање на доделување на државна помош“,
се наведува во соопштението на Дирекцијата за ТИРЗ.
Веста дека во тетовската Технолошко-индустриска зона ќе се гради фабрика за производство на електрични возила одекна на 11 август 2022 година, а преку објава на Фејсбук ја сподели тогашниот прв вицепремиер Артан Груби. Тој, по седница на Владата информира дека била донесена одлука државата да инвестира 130 милиони евра. Инвестицијата дополнително помпезно беше најавена и на одбележувањето на годишнината од Рамковниот договор истата година.
Во Тетово ќе се произведуваат електрични автомобили, најави Владата
Беше поставен и камен-темелник за изградба на фабриката, но во меѓувреме работите застанаа, а од Владата како причина наведуваа разни околности.
Во април минатата година, „360 степени“ објави дека на локацијата не се изведуваат градежни работи. Тогаш се обративме и до фирмата „Еколог“, која е локалниот партнер на инвеститорот, германската компанија „Е-го“. Но, тогаш оттаму немаше одговор на прашањата – зошто доцни стартот, дали инвестицијата е одложена и кога ќе почне градбата и производството.