„Кога би бирале меѓу став на брутален комунистички режим и ставот на нашиот стратешки партнер Соединетите Американски Држави, со кои имаме силни економски, политички, военобезбедносни односи, за мене нема никаква дилема која е страната што треба да ја избереме“, изјави денеска шефот на дипломатијата
Зошто нашата држава би застанала да поддржи режим на брутален диктатор, кој својот народ го оставил без енергенси, храна и медицински производи? Ова денеска го изјави шефот на македонската дипломатија Тимчо Муцунски, одговарајќи на новинарско прашање во врска со гласањето на Македонија против резолуцијата со која се повикува на укинување на американското економско ембарго врз Куба.
Резолуцијата вчера повторно беше усвоена од Генералното собрание на Обединетите нации (ОН), а Македонија беше една од 17-те земји што гласаа против.
Одговарајќи на прашањето за ваквата позиција на земјава, Муцунски на заедничката прес-конференција со својот словачки колега Јурај Бланар, кој е во официјална посета на земјава, рече дека Македонија веќе повеќе години гласа на оваа линија кога станува збор за резолуцијата за Куба.
Шефот на дипломатијата во тој контекст наведе дека има и неколку земји членки на Европската Унија кои гласаат против резолуцијата, а од вчера кон таа група се приклучила и Словенија.
Бранејќи ја позицијата на земјава, Муцунски рече дека не гледа логика Македонија да не ги поддржи Соединетите Американски Држави (САД) за прашање што е нивен геополитички интерес. Шефот на дипломатијата додаде дека, исто така, не гледа никаква логика зошто нашата држава би застанала да поддржи, како што кажа, режим на брутален диктатор, што го има оставено својот народ без енергенси, храна и медицински производи.
„Односно да го поставиме прашањето: Кој е нашиот интерес да застенеме во поддршка на брутален комунистички режим? Јас тука не гледам никаква рационалност. Кога би бирале меѓу став на брутален комунистички режим и ставот на нашиот стратешки партнер Соединетите Американски Држави, со кои имаме силни економски, политички, военобезбедносни односи, за мене нема никаква дилема која е страната што треба да ја избереме“,
изјави министерот за надворешни работи и надворешна трговија.
Резолуцијата за укинување на економското ембарго на Соединетите Држави врз Куба вчера доби поддршка од 130 земји членки на Обединетите нации, додека 17 беа „против“, а 25 гласаа „воздржано“. Инаку, во споредба со претходната годинa поддршката за Резолуцијата е намалена, ако се има предвид дека тогаш „за“ гласаа 165 земји, седум беа „против“ и 12 „воздржани“.
Меѓу земјите што гласаа против оваа година покрај Северна Македонија, беа и Босна и Херцеговина, Колумбија, Костарика, Еквадор, Литванија, Мароко, Парагвај и Словенија.
Неколку западни земји, меѓу кои Германија и Италија, првпат по многу години беа воздржани.
Иако резолуциите на Генералното собрание на ОН не се правно обврзувачки, тие ја одразуваат позицијата на меѓународната заедница за ова прашање.
Дебатата беше проследена со остар вербален судир меѓу кубанскиот министер за надворешни работи, Бруно Родригез и американскиот амбасадор во Обединетите нации, Мајк Валц, што само дополнително ги нагласи тензиите меѓу Вашингтон и Хавана. Родригез, пред гласањето ги обвини САД дека водат економска војна против неговата земја, оценувајќи дека Куба не претставува закана. Од друга страна, американскиот амбасадор Валц, ги повика земјите членки на светската организација да не ја поддржат резолуцијата, тврдејќи дека кубанската влада го користи гласањето за политичка пропаганда.
Ембаргото на САД врз Куба беше воведено во 1960 година, по револуцијата предводена од Фидел Кастро и национализацијата на имотот на американските граѓани и компании. Односите меѓу двете земји дополнително се влошија откако администрацијата на американскиот претседател Доналд Трамп најави царини за земјите што ѝ продаваат или испорачуваат нафта на Куба.
Овие мерки придонесоа за прекини во снабдувањето со гориво и електрична енергија на островот, со последици врз основните услуги, вклучително и водоснабдувањето и телекомуникациите.