Засега нема официјална потврда за ова иако, според информациите на „360 степени“, Владата денеска во 14 часот ќе одржи седница на чиј дневен ред има и точка – кадровски прашања
Владата планира денеска да ја разреши Ана Петровска од директорската позиција во Државниот инспекторат за животна средина (ДИЖС), дознава „360 степени“. Засега нема официјална потврда за ова иако, според нашите информации, Владата денеска во 14 часот ќе одржи седница, на чиј дневен ред има и точка – кадровски прашања. Двајцата владини портпароли денеска претпладне останаа недостапни за „360 степени“ за да ги потврдат или демантираат овие информации.
Случајно или не, за денеска во 10 часот Петровска закажа прес-конференција во врска со шестмесечниот извештај за работата на Инспекторатот. Во најавата се вели дека Петровска ќе презентира податоци за „зголемениот обем на надзори во 2021 година во споредба со лани и за изречените казни“.
Петровска, во телефонски разговор, пред малку ни рече дека не би сакала да си ја расипе прес-конференцијата и не сакаше да ги коментира најавите за нејзино разрешување.
Јавна тајна е дека Петровска, која за директорка дојде како кадар на ДОМ, е во конфликт со лидерката на партијата, Маја Морачанин, и дека евентуалното разрешување може да се смета за кулминација на внатрепартиските случувања.
„360 степени““ ја контактираше и Морачанин, која ни рече дека би коментирала дури откако би се случило такво нешто, ако се случи.
Внатрепартиските превирања во ДОМ добија јавност кон средината на мај годинава кога Петровска и на Мирослав Богдановски, останаа без партиските функции.
На тогашната седница на Централниот одбор на партијата, со мнозинство гласови, им беше изгласана недоверба, со што Петровска и Богдановски ги изгубија позициите потпретседатели и членови на Извршниот одбор. Причината, како што тогаш наведоа од ДОМ, е нелегитимна иницијатива за одржување вонреден партиски конгрес.
Подоцна, Богдановски најави дека ќе дејствува како независен пратеник, а потоа поднесе и оставка.