Од Општина Центар велат дека пред да одговорат на нашите прашања ќе ги почекаат наодите на инспекторите кои денеска се на терен
На парцела на Водно, над куќите на улицата „Питу Гули“, утринава работеле багери, реагираат жители кои водат сизифовска битка за да ја спасат шумата од нови градби.
Багерите се на парцелата на фирмата „Маркеза“, која доби градежна дозвола уште во 2021 година, иако до неа нема пристапен пат. На терен се ита, иако градоначалникот на Центар, Горан Герасимовски, лани во јуни соопшти дека ги стопирал сите градежни дејства (затоа што нема пристапен пат), а и Уставниот суд го укина деталниот урбанистички план Ј07 кој го опфаќа овој потег. Таа одлука значи дека оние граѓани и инвеститори што досега успеале да ги обезбедат сите потребни документи од Општина Центар и почнале или завршиле со градежните активности на наведените локации, меѓу кои се и атрактивните парцели на Водно, не се засегнати. Од друга страна, оние инвеститори кои купиле плацови со намера да градат, но досега не ја обезбедиле потребната документација од Општината, нема да можат да го направат тоа.
„Утрово во 7 часот ги забележавме вработените на ‘Маркеза’ како стојат на улицата ‘Питу Гули’ со својата градежна механизација. Водејќи се по укинатиот ДУП од страна на Уставен суд за овој дел од Центар и по последната изјава на градоначалникот Герасимовски, бевме убедени дека нема да дојде до ова. Герасимовски, во рамки на кампањата ‘Рамо до рамо’, минатата недела имаше средба со нас жителите и лично се пофали дека е запрена узурпацијата на овој потег на Водно. На средбата, на која беше присутна и Сања Лукаревска, таа рече дека лично ќе се обврзе жителите да живеат во мир – бидејќи веќе два месеци трпевме закани, јавувања и разноразни вознемирувања од оние што стојат зад оваа градба. Ние реагиравме преку адвокат до Општината и во неколку точки образложивме за незаконитости. Општина Центар ги изигнорира нашите многу валидни аргументи кои укажуваа на сериозни пропусти во постапката за издавање на градежната дозвола. Поднесовме неколку жалби до Управниот инспекторат, од каде ни беше кажано дека по итна постапка ќе пратат инспектори на терен. Иако мислевме дека извојувавме победа за спас на шумата, очигледно не е така“,
вели Леана Таќи, жителка на ул. „Питу Гули“, која на социјалните мрежи утрово алармираше за случувањата на Водно.
Прашавме во Општина Центар, зошто има активности на овој потег кога Уставниот суд го укинa деталниот урбанистички план Ј07, дали ако „Маркеза“ побара, Општината ќе им ја продолжи дозволата за градба и дали ги имаат предвид укажувањата на водњанци дека фирмата приложила фиктивен елаборат и дека има ред други пропусти во проектната документација.
Од Општина Центар рекоа дека пред да одговорат ќе ги почекаат наодите на инспекторите, кои денеска ја проверувале локацијата.
Жители на Водно, преку жестоки јавни реакции, бараат поништување на градежната дозвола што на „Маркеза“ ѝ ја потпиша ексградоначалникот Богдановиќ, водејќи се од деталниот урбанистички план донесен во 2014 г. со спорно мнозинство и со низа контрадикторности.
Сопственик на фирмата „Маркеза“ е извесен Филип Костиќ. Таа, според Истражувачката репортерска лабораторија, има деловни односи со фирмата БИСИ ДООЕЛ, инаку во сопственост на поранешниот пратеник од редовите на ВМРО-ДПМНЕ, Ивица Георгиевски-Фреди. Георгиевски во разговор со ИРЛ демантирал секаква поврзаност со градбата на Водно.
Од „Маркеза“ досега единствено се имаат обратено преку соопштение. Тие изминатиов период укажуваа дека имаат важечка дозвола за градба и ја потсетуваа Општината дека е должна да им направи пристапен пат.
Водњанци, пак, тврдат дека фирмата приложила и фиктивен елаборат, како една од основите според кои Герасимовски може да ја поништи градежната дозвола.
Инаку, па парцелата се сечеше шума на 31 декември 2021 година – во очи Нова година, а просторот е ограден со лим. Градоначалникот Горан Герасимовски минатата година кажа дека, сепак, нема да гради пат на тој дел од Водно, како и дека се стопирани и градежните дејствија со образложение дека отпочнале градежни активности, а нема пристапен пат, наместо обратно.
Случајот се чини доби правна разврска со одлуката на Уставен суд оти конкретна градба нема на терен, но денеска жителите велат дека џабе се порадувале дека ја спасиле шумата.