Од Општината наведуваат дека инвеститорот започнал да копа на парцелата, очигледно со цел, како што велат, за да ја задржи правосилната дозвола за градба, која ја губи доколку не почне со градежни активности во предвидениот рок
Ова следува откако околните жители вчера алармираа за повторни градежни активности на Водно, по што општинските инспектори најавија дека ќе излезат на терен да ја проверат локацијата
Општина Центар денеска преку писмено соопштение информира дека повела постапка за санкционирање на фирмата што копала на парцела на Водно. Ова следува откако околните жители вчера алармираа за повторни градежни активности на Водно, по што општинските инспектори најавија дека ќе излезат на терен да ја проверат локацијата.
Градежната механизација, за која вчера алармираа жителите, е на парцелата на фирмата „Маркеза“, која доби градежна дозвола уште во 2021 година, иако до неа нема пристапен пат.
Градоначалникот на Центар, Горан Герасимовски, лани во јуни соопшти дека ги стопирал сите градежни дејства (затоа што нема пристапен пат), а и Уставниот суд го укина Деталниот урбанистички план Ј07 кој го опфаќа овој потег. Таа одлука значи дека оние граѓани и инвеститори што досега успеале да ги обезбедат сите потребни документи од Општина Центар и почнале или завршиле со градежните активности на наведените локации, меѓу кои се и атрактивните парцели на Водно, не се засегнати. Оние инвеститори, пак, кои купиле плацови со намера да градат, но досега не ја обезбедиле потребната документација од Општината, нема да можат да го направат тоа.
Од Општина Центар во денешното соопштение наведуваат дека инвеститорот започнал да копа на парцелата, очигледно со цел, како што велат, за да ја задржи правосилната дозвола за градба, која ја губи доколку не почне со градежни активности во предвидениот рок.
„Но, тоа е сѐ што може да направи, бидејќи градба не може да има доколку нема пристапен пат, за кој како што веќе во повеќе наврати потврдив, општината нема да го гради. На овој потег додека сум јас градоначалник нема да дозволам градба“,
вели градоначалникот на Центар, Горан Герасимовски, во соопштението испратено до медиумите.
Жители на Водно, преку жестоки јавни реакции, бараат поништување на градежната дозвола што на „Маркеза“ ѝ ја потпиша ексградоначалникот Богдановиќ, водејќи се од Деталниот урбанистички план донесен во 2014 г. со спорно мнозинство и со низа контрадикторности.
Сопственик на фирмата „Маркеза“ е извесен Филип Костиќ. Таа, според Истражувачката репортерска лабораторија, има деловни односи со фирмата БИСИ ДООЕЛ, инаку во сопственост на поранешниот пратеник од редовите на ВМРО-ДПМНЕ, Ивица Георгиевски-Фреди. Георгиевски во разговор со ИРЛ демантирал секаква поврзаност со градбата на Водно.
Од „Маркеза“ досега единствено се имаат обратено преку соопштение. Тие изминатиов период укажуваа дека имаат важечка дозвола за градба и ја потсетуваа Општината дека е должна да им направи пристапен пат.
Водњанци, пак, тврдат дека фирмата приложила и фиктивен елаборат, како една од основите според кои Герасимовски може да ја поништи градежната дозвола.
Инаку, за парцелата се сечеше шума на 31 декември 2021 година – во очи Нова година, а просторот е ограден со лим. Градоначалникот Горан Герасимовски минатата година кажа дека, сепак, нема да гради пат на тој дел од Водно, како и дека се стопирани и градежните дејствија со образложение дека отпочнале градежни активности, а нема пристапен пат, наместо обратно.
Случајот се чини доби правна разврска со одлуката на Уставен суд оти конкретна градба нема на терен, но денеска жителите велат дека џабе се порадувале дека ја спасиле шумата.