Шестмина чувари, кои биле во контакт со притвореникот и биле таму кога се констатирала смртта, веднаш по добивањето на резултатите се испратени дома во изолација и ќе се тестираат, а брисеви им се земаат и на притворениците кои биле во исто одделение
Ситуацијата во затворот „Скопје“ во Шуто Оризари е редовна и е ставена под контрола, велат од Управата за извршување санкции откако се појави видео дека притвореници во револт и паника фрлале чинии од прозорец по сознанието дека кај починат притвореник постхумно е утврдено дека има коронавирус.
„Тоа се случило вчера, но веднаш потоа состојбата е ставена под контрола и е редовна. Станува збор за фрлени пластични чинии кои им припаѓаат на затворениците, за кои им е дозволено да ги имаат во нивните простории, не се чиниите од затворот“,
велат од Управата за „360 степени“.
Притвореникот за кој вчера објави министерот Венко Филипче починал од срцев удар, а по смртта бил земен брис за тестирање.
Во притвор тој влегол на 8 март, а мерките и препораките за превенција и посебен протокол, посочуваат од Управата се од 10 март, по што два дена во Шутка се правела реорганизација за да се ослободат простории и од 13 март почнале да се применуваат. Притворениците кои се примени од 13 март се сместуваат посебно во одделни ќелии.
Бидејќи притвореникот дошол пред да се воведат мерките и препораките, од Управата посочуваат дека и вчера и денеска во затворот ќе се земаат примероци за да се направат тестови кај лицата кои биле во исто одделение и кај вработените.
Шестмина вработени кои биле во контакт со притвореникот и биле таму кога се констатирала смртта, веднаш по добивањето на резултатите се испратени дома во изолација.
Во ќелијата каде што бил починатиот биле тројца притвореници. И тие, но и другите притвореници ќе подлежат на тестирање.
И од Министерството за здравство утрово излегоа со истите најави. Оттаму посочија дека во текот на вчерашниот ден во истражниот затвор се направени прегледи и се земени брисеви од 30 притвореници.
„Денеска во истражниот затвор во Шутка се испратени засилени медицински екипи на Здравствениот дом кои ќе направат прегледи и ќе земат брисеви од сите што престојувале во истото одделение со починатиот, а прегледани и тестирани на ковид-19 ќе бидат и вработените во одделението“,
најавија од Министерството.
*Поврзани вести:
Притвореник во Шутка, кој починал од срцев удар, бил позитивен на коронавирусот
„Тетова сот“: Притвореници во Шутка фрлале чинии од прозорци