Поради значителни штети работите во некои региони може да траат подолго, но од „Укренерго“ велат дека нема причина за паника бидејќи има јасни планови и протоколи кои во моментот се спроведуваат
Украинската национална енергетска компанија „Укренерго“ објави дека нема причина за паника по рускиот напад на украинската инфраструктура.
„За жал, некои објекти на енергетската инфраструктура беа погодени, што предизвика прекин на електричната енергија во сите региони на Украина“,
се вели во соопштението на „Укренерго“.
Од таму нагласуваат дека поради значителни штети работите во некои региони може да траат подолго, но дека „нема причина за паника“ бидејќи има „јасни планови и протоколи кои во моментов се спроведуваат“.
Електричната енергија прво ќе биде вратена на критичните инфраструктурни објекти како што се водоснабдувачките капацитети, топлани, болници и станици.
Украинските инженери работат на поправка на електричната мрежа по рускиот напад, а за неколку часа критичната инфраструктура во Киевската област повторно би требало да има струја, најави Олексиј Кулеба, шеф на воената управа на Киевската област.
„Во следните часови очекуваме добри вести за повторно воспоставување на снабдување со електрична енергија на критичните инфраструктурни објекти, а потоа постепено ќе се обнови снабдувањето со електрична енергија и во градовите“,
рече Кулеба.
Покрај тоа, рече тој, низ Украина се отвораат „центри на непобедливост“. Тоа се шатори каде што локалното население може да ги полнат своите телефони или да добијат храна или други работи што им се потребни.
Снабдувањето со електрична енергија е вратено на половина Лвив, а и 70 отсто од водоснабдувањето е вратено, објави на Телеграм градоначалникот на овој град Андриј Садовиј.
„Во половина од Лвив е вратена електрична енергија. Но, запомнете дека планираните исклучувања ќе продолжат. Седумдесет отсто од водоснабдувањето во градот е обновено“,
напиша тој.