До Централен регистар на ден 10.02.2023 година е доставен Допис со наслов – Предмет: Барање за усогласување на работата на Здружение за афирмација на културните вредности на македонските Бугари „ЦАР БОРИС III“ Охрид со Закон за изменување и дополнување на Законот за здруженија и фондации („Службен весник на Република Северна Македонија“ број 239/2022), информираат од Централен регистар
Рокот во кој бугарските клубови, согласно Законот за здруженија и фондации, требаше да поднесат барање до Централен регистар за промена на имињата, истекува денеска, информираат од Централниот регистар.
„Организациите регистрирани согласно одредбите на Законот за здруженија и фондации („Службен весник на Република Македонија“ број 52/10, 135/11 и 55/16), кои нема да ги усогласат името и/или називот, скратеното име, програмата, целите и дејностите, се бришат од Регистарот врз основа на донесена одлука за неусогласеност од страна на министерот за правда по претходно добиено негативно мислење од Комисијата. Одлуката за неусогласеност од страна на Министерството за правда се донесува во рок од четири месеци од денот на влегувањето во сила на Законот за изменување и дополнување на Законот за здруженија и фондации“,
посочуваат од Централниот регистар преку соопштение.
До Централен регистар на ден 10.02.2023 година е доставен Допис со наслов – Предмет: Барање за усогласување на работата на Здружение за афирмација на културните вредности на македонските Бугари „ЦАР БОРИС III“ Охрид со Закон за изменување и дополнување на Законот за здруженија и фондации („Службен весник на Република Северна Македонија“ број 239/2022), додаваат оттаму.
„На Допис-барањето од подносителот, Централниот регистар до подносителот на Дописот достави Известување за поднесување на пријава и прилози за соодветната промена согласно Законот за здруженија и фондации. Во текот на утрешниот ден, Централниот регистар ќе достави список на здруженија кои понатаму треба да бидат предмет на анализа од страна на Министерството за правда. Дополнително, Централен регистар ќе достави информација до Министерството за правда дали Здружението за афирмација на културните вредности на македонските Бугари „ЦАР БОРИС III“ Охрид постапило по Известувањето од Централен регистар, односно дали поднело пријава и прилози за соодветната промена согласно Законот за здруженија и фондации“,
соопштија од Централниот регистар.
Од Културниот центар „Ванчо Михајлов“ од Битола, пак, сè уште немаат доставено барање за измени.
„360 степени“ се обиде да стапи во контакт со претседателот на бугарскиот клуб „Цар Борис Трети“ во Охрид, Томе Блажевски, со цел да дознаеме кое ќе биде новото име на клубот, но неуспешно.
Премиерот Димитар Ковачевски, денеска, одговарајќи на новинарски прашања, беше дециден дека бугарските клубови кои нема да ги сменат своите имиња согласно Законот за здруженија и фондации, нема да продолжат со својата работа.
„Сите имаа време да ги усогласат имињата согласно новиот Закон. Тие кои го направиле тоа, ќе продолжат да работат, другите нема. Еден клуб, како што разбрав, поднел барање до Централен регистар за промена на името. Штом тоа ќе го направат, ќе продолжат со работа, бидејќи културните клубови треба да бидат места кои ги зближуваат граѓаните, а не да бидат места коишто со своите имиња или на друг начин будат негативни чувства и ги разединуваат граѓаните и народите во соседството. Законот ќе биде спроведен во целост како и сите други закони“,
рече Ковачевски.
Собранието на почетокот на ноември минатата година ги усвои измените на Законот за здруженија и фондации според кои се забранува граѓански здруженија, фондации и политички партии да користат имиња, прекари, псевдоними кои се поврзани со фашизам, нацизам, геноцид, Третиот рајх и сл.
Законот за здруженија и фондации предвидува дека одобрение за употреба на име, презиме, прекар, псевдоним, кратенка или иницијали на историска личност, согласност дава министерот за правда по претходно добиено позитивно мислење од Комисијата за употреба на имињата на историски личности, а која ја формира самиот министер.
Законските измени имаат и ретроактивно значење, односно предвидуваат дека сите досега формирани организации, здруженија, фондации, сојузи итн. имаат рок од три месеци да го усогласат своето име или назив согласно законските прописи.