Како што објавивме вчера, бугарското здружение „Цар Борис Трети“ од Охрид поднело барање до Централниот регистар за промена на името согласно измените на Законот за здруженија и фондации. Од Културниот центар „Ванчо Михајлов“ од Битола, пак, сè уште немаат доставено барање за измени
Клубовите кои нема да ги сменат своите имиња согласно нашиот Закон за здруженија и фондации кој е изгласан со апсолутно мнозинство, нема да продолжат со својата работа, изјави денеска премиерот Димитар Ковачевски коментирајќи го истекувањето на законскиот рок во кој двата бугарски клуба, „Цар Борис Трети“ во Охрид и „Ванчо Михајлов“ во Битола, треба да поднесат барање за промена на имињата.
„Сите имаа време да ги усогласат имињата согласно новиот Закон. Тие кои го направиле тоа, ќе продолжат да работат, другите нема. Еден клуб, како што разбрав, поднел барање до Централен регистар за промена на името. Штом тоа ќе го направат, ќе продолжат со работа, бидејќи културните клубови треба да бидат места кои ги зближуваат граѓаните, а не да бидат места коишто со своите имиња или на друг начин будат негативни чувства и ги разединуваат граѓаните и народите во соседството. Законот ќе биде спроведен во целост како и сите други закони“,
дециден беше Ковачевски.
Како што објавивме вчера, бугарското здружение „Цар Борис Трети“ од Охрид поднело барање до Централниот регистар за промена на името согласно измените на Законот за здруженија и фондации. Од Културниот центар „Ванчо Михајлов“ во Битола, пак, сè уште немаат доставено барање за измени.
„360 степени“ се обиде да стапи во контакт со претседателот на бугарскиот клуб „Цар Борис Трети“ во Охрид, Томе Блажевски, со цел да дознаеме кое ќе биде новото име на клубот, но неуспешно.
Собранието на почетокот на ноември минатата година ги усвои измените на Законот за здруженија и фондации според кои се забранува граѓански здруженија, фондации и политички партии да користат имиња, прекари, псевдоними кои се поврзани со фашизам, нацизам, геноцид, Третиот рајх и сл.
Законските измени имаат и ретроактивно значење, односно предвидуваат дека сите досега формирани организации, здруженија, фондации, сојузи итн. имаат рок од три месеци да го усогласат своето име или назив согласно законските прописи.