Клубот „Цар Борис Трети“ од Охрид поднел барање за смена на името, но не и „Ванчо Михајлов“ од Битола

„360 степени“ се обиде да стапи во контакт со претседателот на бугарскиот клуб „Цар Борис Трети“ во Охрид, Томе Блажевски, со цел да дознаеме кое ќе биде новото име на клубот, но неуспешно

Бугарското здружение „Цар Борис Трети“ од Охрид поднело барање до Централниот регистар за промена на името согласно измените на Законот за здруженија и фондации. Од Културниот центар „Ванчо Михајлов“ од Битола, пак, на еден ден пред истекот на рокот сè уште немаат доставено барање за измени.

„До Централен регистар на 10.02.2023 година е доставен допис со барање за усогласување на работата на Здружение за афирмација на културните вредности на македонските Бугари „Цар Борис Трети“ Охрид со измените и дополнувањето на Законот за здруженија и фондации. Постапката по барањето сè уште e во тек. За здружението „Ванчо Михајлов“ од Битола не е поднесено барање“,

информираат од Централен регистар.

„360 степени“ се обиде да стапи во контакт со претседателот на бугарскиот клуб „Цар Борис Трети“ во Охрид, Томе Блажевски, со цел да дознаеме кое ќе биде новото име на клубот, но неуспешно.

Собранието на почетокот на ноември минатата година ги усвои измените на Законот за здруженија и фондации според кои се забранува граѓански здруженија, фондации и политички партии да користат имиња, прекари, псевдоними кои се поврзани со фашизам, нацизам, геноцид, третиот рајх и сл.

Без ниту еден глас против, пратениците ги изгласаа измените на законите за здруженија и за политички партии

Законот за здруженија и фондации предвидува дека одобрение за употреба на име, презиме, прекар, псевдоним, кратенка или иницијали на историска личност, согласност дава министерот за правда по претходно добиено позитивно мислење од Комисијата за употреба на имињата на историски личности, а која ја формира самиот министер.

Законските измени имаат и ретроактивно значење, односно предвидуваат дека сите досега формирани организации, здруженија, фондации, сојузи итн. имаат рок од три месеци да го усогласат своето име или назив согласно законските прописи.

Министерот за надворешни работи Бујар Османи денеска се сретна со Ѓорѓи Трендафилов и со Љупчо Ѓоргиевски, претставници на организации на бугарската заедница во Северна Македонија. Трендафилов и Георгиевски од Османи побарале заедно со него да се обидат да посредуваат во смирување на тензиите на релација Скопје-Софија, зашто според нив во ваква експлозивна атмосфера е невозможно да се носат квалитетни и рационални политички решенија.

„На средбата беше изразено задоволство од директниот пристап во размената на мислења, како и интенцијата за повторна средба и засилена динамика на комуникација, со цел подиректно вклучување на бугарската заедница и здруженијата кои нив ги претставуваат во рамките на редовната соработка на државата со граѓанскиот сектор“,

информираа од МНР.

Претставници на бугарските организации во земјава од Османи побарале да посредуваат во смирување на тензиите меѓу Скопје и Софија

Како што изјави Трендафилов по средбата, со Османи не разговарале за менување на имињата на двата бугарски клуба во земјава.