Генералната директорка ЕК за здравството Сандра Галина вчера во своето обраќање пред европратениците истакна дека Комисијата затоа се свртува кон вакцините произведени од лабораториите „Фајзер/Бионтек“ и „Џонсон и Џонсон“
Европската комисија објави дека се дистанцира од лабораторијата на „Астра Зенека“ како дел од стратегијата за вакцинирање против ковид-19 во првиот квартал, по големите доцнења во испораката на вакцината од британско-шведската компанија.
„Астра Зенека“, чија вакцина требаше да се користи за масовно вакцинирање во првиот квартал од 2021 година, не може да гарантира дека ќе испорача повеќе од 25 проценти од ветените 100 милиони дози, што за европските држави е проблем, изјави вчера генералната директорка ЕК за здравството Сандра Галина во своето обраќање пред европратениците.
Таа истакна дека Комисијата затоа се свртува кон вакцините произведени од лабораториите „Фајзер/Бионтек“ и „Џонсон и Џонсон“.
Германската лабораторија „Бионтек“ вчера вети дека ќе испорача до 75 милиони дополнителни дози на вакцини што ги произведува со американската компанија „Фајзер“ во ЕУ во вториот квартал.
„Ќе има многу повеќе дози во вториот квартал со влегувањето во сила на новиот договор. Нема да ги имаме само ‘Бионтек’ и ‘Модерна’, туку и ‘Џонсон и Џонсон’ со нов договор, што е двојно поголема сума“,
рече Галина.
„Астра Зенека“ доцни со испораката на вакцини, како што објаснија, поради падот на производството во една од нејзините фабрики во Европа.
Европската Унија ја обвини британската лабораторија за фаворизирање на Велика Британија во испораката на вакцини на штета на договорните обврски со Брисел, на што директорот на „Астра Зенека“, Паскал Сорио, одговори дека според договорот компанијата ветила дека ќе стори сѐ што може, кога станува збор за испораките, бидејќи договорите не се обврзувачки.
Тој, пак ја обвини Унијата дека иако ги направила нарачките подоцна од Британија, очекува испораките да бидат истовремено.
„Роковите се обврзувачки кога станува збор за нарачување вакцини… Не гледам каде се вашите напори“,
му одговори Галина додавајќи дека договорот предвидува или набавка на производи или враќање на уплатената сума.
Европската комисија одвои 336 милиони евра на „Астра Зенека“ за развој на вакцината и зголемување на производствениот капацитет, иако целосната сума сè уште не е платена.
„Ако нема вакцина, нема ни да платиме“,
рече Галина.
Изјавата на Галина следува по вчерашната објава на Твитер на претседателката на Европската комисија Урсула фон дер Лајен дека „Астра Зенека“ ќе испорача уште 9 милиони дози вакцини против ковид-19 во првиот квартал од годинава или вкупно уште 40 милиони дози, која алудираше дека проблемите со испораката конечно се решени.
Испораките се очекува да бидат една недела порано од предвиденото, а воедно компанијата ќе ги прошири своите производни капацитети во Европа.
Европската агенција за лекови на крајот на минатиот месец ја одобри употребата на вакцината против ковид-19, изработена од британско-шведската компанија „Астра Зенека“ во соработка со Универзитетот Оксфорд.