Извршниот директор на компанијата ја обвини ЕУ дека, иако склучила договор подоцна од Велика Британија, очекувала испораката да биде во исто време, што според него е невозможно
Производителот на вакцини „Астра Зенека“ одби да се сретне со највисоките претставници на ЕУ за да разговара за проблемите со производството на вакцини против коронавирусот.
Средбата беше откажана по вчерашното интервју на извршниот директор Паскал Сорао, кој рече дека немаат договорна обврска, но компанијата се согласила да даде сѐ од себе и да ја снабди ЕУ со својата вакцина.
Наместо состанокот што беше планиран вечерва, компанијата писмено ќе одговори на еврокомесарката Стела Киријакидес, која побара објаснување од „Астра Зенека“ зошто доцни со испорака и производство на вакцини.
Главниот извршен директор на фармацевтскиот гигант „Астра Зенека“, Паскал Сорио, упати апел до европската јавност да покаже разбирање во врска со одложувањата на планираните испораки на вакцините против ковид-19 и додаде дека компанијата не е законски обврзана со одредена временска рамка.
Сорио во интервју за „Република“ рече дека ЕУ го потпишала својот договор со компанијата три месеци подоцна од Велика Британија, а очекувала испораките да бидат истовремено.
Европската комисија, која во август лани склучи договор за набавка на 400 милиони дози од оксфордската вакцина, е незадоволна поради доцнењето на испораката бидејќи очекувала до крајот на март да добие 80 милиони дози, но сега очекува само 31 милион.