Комисијата, најнапред, заклучила дека се работи за документарен филм од исклучителен јавен интерес, кој обработува сериозна тема поврзана со квалитетот на нафтата и нафтените деривати кои се користат во земјава, а кои негативно влијаат на аерозагадувањето и на здравјето на граѓаните
Советот за етика во медиумите на Македонија (СЕММ), со мнозинство гласови ја отфрли како неоснована жалбата на бизнисменот и поранешен вицепремиер за економски прашања, Кочо Анѓушев, за сторијата на Истражувачката репортерска лабораторија за мазутот.
„Во документарниот филм ‘Заговор против воздухот’ на Истражувачката репортерска лабораторија – ИРЛ, емитувана на Македонската Радио Телевизија на 16 мај 2021 година, не се прекршени етичките и професионални стандарди. Комисијата за жалби утврди дека жалбата е НЕОСНОВАНА и со мнозинство гласови одлучи дека нема прекршување на Кодексот на новинарите на Македонија. Членовите на Комисијата не најдоа доволно елементи за да констатираат неточно и нефер известување, незастапена втора страна и пристрасност и неурамнотеженост во информирањето“,
се вели во одлуката на СЕММ што ја донесле на седницата одржана на 31 мај.
Комисијата, најнапред, заклучила дека се работи за документарен филм од исклучителен јавен интерес, кој обработува сериозна тема поврзана со квалитетот на нафтата и нафтените деривати кои се користат во земјава, а кои негативно влијаат на аерозагадувањето и на здравјето на граѓаните.
„Се работи за обемно и аргументирано истражување, кое побуди огромен интерес во јавноста и воедно експресно ги предизвика институциите да ги проверат наводите дека мазут со сомнителен квалитет бил увезуван во државата. Содржината е повеќестрана и опфаќа значајни аспекти на темата. Авторите презентираат широк спектар извори на информации, од документи и архивски материјали, преку ставови на низа релевантни надлежни институции до наоди и податоци кои произлегле како резултат на истражувањето. Став на Комисијата е дека епилогот од сторијата е евидентен и дека новинарскиот производ одговорил на клучните прашања – дали се увезувал опасен мазут, кој е патот на нафтениот дериват и фирмата што го увезувала и каде се сѐ користел за употреба. Авторите, отвораат оправдани дилеми и прашања во насока дали и кој знаел, а можеби ‘замижувал’ на целиот случај и дали во заднина се крие евентуална злоупотреба на моќ“,
се вели во образложението на одлуката на Советот за етика.
Бизнисменот и генерален директор на „Брако“ – Велес, Кочо Анѓушев, во жалбата до Советот за етика наведува дека емисијата содржи неточно и нефер известување, незастапена втора страна и пристрасност и неурамнотеженост во информирањето. Подносителот на жалбата, Кочо Анѓушев, нагласува дека причина за поднесување на оваа претставка е непрофесионалното и тенденциозно постапување на медиумот и воедно нагласува дека ги демантира наводите изнесени во емисијата.
Главната уредничка на ИРЛ, Сашка Цветковска и одговорната уредничка на МТВ 1, Анета Андонова одговорија на наводите на жалителот. Цветковска вели дека целата приказна поминала низ ригорозна процедура на проверка на фактите во партнерската организација OCCRP во траење од 34 дена. Цветковска потенцира дека ИРЛ никаде во својот документарец не ја обвинува компанијата „Брако“ за увоз на мазутот, како што тврди жалителот, ниту го обвинува Анѓушев дека увезува мазут, туку дека истражувањето на ИРЛ покажало кои биле клиентите на компанијата „Евротим“ која што е предмет на ова истражување. Уредничката на ИРЛ вели дека подносителот на жалбата во истражувањето бил споменат од инволвираните страни, како личност која што ги запознала бизнис групите од интерес во С Македонија и Босна и Херцеговина и им помогнал да остварат соработка.
Во однос на самата жалба, поднесена од Анѓушев, кој во најголем дел реагира дека не му била овозможена „втора страна“, Советот за етика оценува дека тој е јавна личност, истакнат македонски бизнисмен и поранешен вицепремиер за економски прашања, профил кој подлежи на потенцијално силен јавен надзор.
„Новинарската слобода вклучува и искажување на гледишта до степен на претерување, дури и провокација, сѐ со цел да поттикне јавна дебата на конкретна тема, нешто што документарецот ‘Заговор против воздухот’ успеа да го оствари“,
се вели во одлуката на СЕММ.