„Овие закани мора да бидат сфатени сериозно имајќи ја предвид безбедносната состојба во земјата и светот“, посочија од Сојузот на средношколци и од МВР побараа брзо расчистување на случајот со цел учениците повторно да имаат непречена настава во школите
Сојузот на средношколци во земјава повика на смиреност кај учениците откако вчера втор ден по ред дел од скопските училишта добија лажни дојави за поставени бомби, а на Министерството за внатрешни работи му порача максимално да се посвети во решавање на случајот.
„Министерството за внатрешни работи максимално да се посвети на потрагата по чиновниците и брзо разрешување на ситуацијата, за повторно да може да имаме непречена и безбедна настава. Овие закани мора да бидат сфатени сериозно имајќи ја предвид безбедносната состојба во земјата и светот“,
апелира Сојузот на средношколци откако втор ден по ред имаше пријави за наводно поставени бомби во средни училишта во Скопје.
Во дописот до медиумите Сојузот ја поздравува брзата реакција на надлежните и безбедносните служби во однос на евакуациите и смета дека покажаната подготвеност и професионалност во ваквите ситуации влеваат одредена доза на сигурност кај учениците.
Учениците, пак, ги повикаа на сплотен и смирен пристап кон проблемот.
„Секој од нас може да придонесе за достигнување на чувството на безбедност во училишните клупи. Ги советуваме учениците одговорно да ги следат насоките од училишните служби, внимателно да ги следат информациите на темата, да се информираат од кредибилни извори, критички да ги консумираат вестите и да ги проверуваат повеќе пати податоците кои ги добиваат. Медиумска писменост е клучна во задржувањето на контрола врз ситуацијата“,
соопшти Сојузот на средношколци и додава дека е отворен за соработка и поддршка во расчистувањето на случаите.
Девет училишта во главниот град вчера на своите електронски адреси добија дојави за поставени бомби во своите објекти, но по спроведените антитерористички проверки од единиците на МВР беше утврдено оти дојавите се лажни.
Завчера, исто така, осум средни училишта во главниот град на своите електронски адреси добија закани за подметнати бомби. Првично имаше дојави за бомби во пет училишта, а потоа уште во три. За сите дојави, како што информираше МВР, се утврди дека се лажни откако завршија антитерористичките проверки во сите школи на чии мејлови беа упатени заканите за наводните бомби.
Министерот за внатрешни работи Оливер Спасовски во синоќешното гостување во емисијата „Вин-вин“ на ТВ Телма кажа дека е познато од каде се испратени мејловите кои вчера и завчера стигнаа на електронските адреси на осум, односно на девет училишта во главниот град. Министерот додаде оти интензивно се работи со цел да се дојде со сторителот, односно до испраќачот на лажните дојави за бомби во училиштата.
Нарекувајќи ги во најмала рака монструозни, министерот Спасовски кажа дека дојавите за бомби веројатно се дел од хибридните напади на кои сме изложени како држава.