Адвокатот на обвинетиот, Димитрија Цобоски, рече дека расправата по предметот не може да се одржи поради протестот на судската администрација, а се работи, како што рече, за предмет што не спаѓа во групата што би се работеле и во вакви услови
Штрајкот на судската администрација го одложи денешното судско рочиште за претепувањето на секретарот на бугарскиот културен клуб во Охрид, Христијан Пендиков.
Адвокатот на обвинетиот, Димитрија Цобоски, рече дека расправата по предметот не може да се одржи поради протестот на судската администрација, а се работи, како што рече, за предмет што не спаѓа во групата што би се работеле и во вакви услови.
Во судницата беа присутни и оштетениот Христијан Пендиков и првообвинетиот во предметот Илија Спасески. Следното судско рочиште по предметот судијата Бојан Мартиноски го закажа за 26 октомври.
Стефан Камишевски, адвокат на Пендиков, рече дека државните органи и обвинителството добро си ја завршиле работата со пронаоѓањето на второобвинетиот, против кого исто така е поднесена кривична пријава.
„Лицето е препознаено, поднесено е соодветно обвинение против него, очекуваме постапката против тоа лице да биде споена со оваа постапка и понатаму да се води како еден предмет, за истото кривично дело. Секако тоа ќе биде соопштено на следното рочиште“,
рече Камишевски.
Ова не е прво одложување на рочиште во овој случај – претходно одложување имаше на 12 јули. Тогаш причината беше отворање боледување на првообвинетиот Илија Спасески во времетраење од најмалку 15 дена. Правните застапници на одбраната доставија медицинска документација и воедно од судот побараа да му го врати одземениот пасош на првообвинетиот за тој да може да се лекува во странство, но судот ваквото барање експресно го одби.
Одлoжување на рочиштето имаше и на 31 мај. Причина за одложувањето тогаш беа новите медицински докази што ги достави обвинителството. Одбраната на Спасески побара одложување на рочиштето за да има повеќе време да ги проучи, но откако судијата Бојан Мартиноски не дозволи, адвокатите на обвинетиот револтирано ја напуштија судницата.
Пендиков двапати претходно не присуствуваше на рочишта од овој судски процес поради, како што соопшти тогаш неговиот адвокат Стефан Камишевски, здравствени причини.
На претходно рочиште, кое се одржа на 5 април, првообвинетиот за нападот на Пендиков, Илија Спасески, рече дека не се чувствува виновен откако претставник на обвинителството го прочита обвинителниот акт, според кој се товари за извршено кривично дело нанесување тешки телесни повреди. Адвокатот на обвинетиот тогаш рече дека не спори оти Пендиков критичната вечер бил повреден, но дека во доказната постапка ќе успее да го убеди судот дека нема докази за зборови од омраза, како што сака тоа да го наметне обвинителството.
Инцидентот со Христијан Пендиков се случи на 19 јануари пред кафе-бар во Охрид. Случајот предизвика тензии во односите меѓу Софија и Скопје. По неговото лекување во Бугарија, Пендиков доби и бугарско државјанство, кое му беше врачено од потпретседателката на Бугарија, Илијана Јотова.