Претседателот на Основниот суд Струга во заминување, Вулнет Винца, кому денеска му беше констатиран престанок на функцијата поради исполнување на условите за пензија, во изјава за „360 степени” потврди дека тричлен кривичен совет, со кој претседавал лично тој, одлучил да му го врати пасошот на бизнисменот Борче Марковски кој, пак, вчера замина за Србија
Од Обвинителството ги потврдија информациите што вчера ги објави „360 степени“ дека ОЈО Струга било против, а дека позитивното мислење за враќање на пасошот на Марковски е дадено по насока на Вишото јавно обвинителство Битола
Претседателот на Основниот суд Струга, Вулнет Винца, кој беше претседател на кривичниот совет што одлучи да му го врати пасошот на битолскиот бизнисмен и почесен конзул на Белорусија во земјава, Борче Марковски, од денеска веќе не е судија поради исполнување на условите за старосна пензија.
Судскиот совет го отфрли неговото барање за продолжување на вршењето на судиската функција поради ненавремено доставување на потребната изјава. Воедно, советот констатира дека Винца месецов ги исполнил условите за старосна пензија.
Како што објави „360 степени“, откако му беше вратен пасошот, бизнисменот Марковски вчера бил задржан на граничниот премин „Табановце“, но по извршените проверки му било дозволено да ја напушти државата бидејќи против него немало активна мерка за забрана на преминување на границата.
Претседателот на Основниот суд Струга во заминување, Вулнет Винца, денеска потврди дека тричлен кривичен совет одлучил да му го врати пасошот на бизнисменот Марковски.
Кога решавал за пасошот веќе исполнувал услови за пензија
Претседателот на Судскиот совет, Александар Камбовски, на денешната седница рече дека до Советот е пристигнато барање од судијата Вулнет Винца за продолжување на функцијата и по исполнување на условите за старосна пензија.
Единствена за збор се јави членката на Судскиот совет, Сузана Јошевска-Анастасовска, која посочи дека од доставената писмена изјава се гледа дека се однесува на продолжување на работниот однос за избрани и именувани лица.
Наведе дека таа е доставена на 21.11.2025 година, иако рокот за доставување на ваквите изјави бил до 31.8.2025 година.
„Од тие причини, сметам дека изјавата е дадена ненавремено и како таква треба да се отфрли“,
рече таа.
Потоа, предлогот на Јошевска-Атанасовска беше ставен на гласање. Со 11 гласа „за“, Судскиот совет донесе одлука со која го отфрли барањето за продолжување на судиската функција
„Судијата Вулнет Винца на Основниот суд Охрид ги исполни условите за старосна пензија на 18.7.2026 година“,
рече Камбовски.
Бидејќи тој ја извршуваше и функцијата претседател на Основниот суд Струга, членовите на Советот определија вршител на должност претседател на тој суд.
Винца не чувствува одговорност за одлуката за пасошот на Марковски
Претседателот на Основниот суд Струга во заминување, Вулнет Винца, кој денеска беше разрешен од функцијата врз основа на исполнување на старосни услови за пензија, во изјава за „360 степени” потврди дека тричлен кривичен совет одлучил да му го врати пасошот на бизнисменот Борче Марковски, кој, како што објавивме вчера, преку граничниот премин „Табановце“ ја напушти државата.
Тој вели дека не чувствува одговорност оти пред да одлучат добиле позитивно мислење од Јавното обвинителство.
„Ние ценевме, ама добивме мислење од овластениот тужител, ОЈО Струга. Не чувствувам одговорност. Имаме закажано рочиште на 2 септември. Ако не се врати, ќе му се суди во отсуство и ќе се одземе имотот“,
рече тој.
„360 степени” два дена чека официјални одговори од Основниот суд Струга за прашањата – под кои околности му е вратен пасошот на Марковски и според кои одредби Судот цени дека мерките – гаранција во имот и одземен пасош – не може да бидат активни истовремено, како што во изјава за „Независен” тврдеше веќе експретседателот на Судот, Вулнет Винца.
Одговор добивме предмалку, телефонски.
„Бидејќи веќе не сум претседател, не можам да потпишувам ништо написмено. Обратете се во Судот“,
ни рече сега Винца.
ОЈО Струга – против, Вишото обвинителство Битола – за
Од Обвинителството предмалку соопштија дека, во конкретниот случај, барањето за укинување на дополнителните мерки за претпазливост изречени при определувањето на гаранцијата е поднесено од одбраната на обвинетиот.
„Надлежниот јавен обвинител од Основното јавно обвинителство Струга првично на 15.6.2026 година даде негативно мислење за прифаќање на ова барање. Откако одбраната поднела ново барање, јавниот обвинител го реферирал предметот во Вишото јавно обвинителство Битола. Од реферирањето е изготвен записник, при што Вишиот јавен обвинител донел заклучок со кој понискиот јавен обвинител го задолжил да поднесе позитивно мислење да се уважи предлогот на одбраната за враќање на привремено одземената патна исправа“,
велат од Обвинителството.
Како аргументи за ваквата одлука, Вишиот јавен обвинител изнесува став дека со определената гаранција се исклучени околностите кои укажуваат на опасност од бегство на обвинетиот.
„Воедно се прифаќаат аргументите на одбраната дека обвинетиот поседува фирма во Република Србија чие работење е сериозно доведено во прашање и постои можност да биде нанесена ненадоместлива штета доколку тој во најкраток можен рок не отпатува таму за да потпише документација во врска со работењето на фирмата.
велат од Обвинителството.
Сите аспекти на ваквата одлука и соодветната аргументација ќе бидат испитани. Во моментов не може да се смета дека обвинетиот е во бегство и тој има обврска да се јавува пред судот“,
За случајот
Марковски и седум други лица беа осомничени за кривични дела поврзани со јавна набавка за дислокација на погонски станици од ТЕЦ „Осломеј“ во РЕК „Битола“.
Иако опремата воопшто не се планирала за во Битола, бил спроведен тендер, потпишан договор во висина од околу 1,7 милиони евра, а неговата компанија „Марковски компани“ како добитник ги демонтирала машините од Кичево, ги донела во Битола и ги оставила немонтирани во кругот на РЕК „Битола”.
Судењето, кое првично започна во Основниот суд во Битола, во меѓувреме беше префрлено во Основниот суд во Струга, по одлука на Апелацискиот суд во Битола.
Првото рочиште во Струга, закажано за 24 јуни, беше одложено бидејќи еден од обвинетите го сменил адвокатот, кој побарал дополнително време за увид во обвинителниот акт.
Новиот обид за почеток на судењето е закажан за 2 септември.
