Наспроти последниот извештај на ЕК за земјава, кој укажува на над 92 проценти усогласеност со заедничката надворешна политика на ЕУ, шефицата на бугарската дипломатија вели дека С Македонија има ислучително ниско ниво на усогласеност – под 50 отсто
Бугарија со месеци предлага да се одржи средба на меѓувладината комисија со Република Северна Македонија за да се направи сериозна анализа на ситуацијата, изјави бугарската министерка за надворешни работи Екатерина Захариева за Бугарското национално радио (БНР).
„Имаме сериозни контакти на оваа тема. Се обидуваме да подготвиме предлог протокол на комисијата. Во него има конкретни работи – историската комисија, да не се дозволи еднострана одлука за прекин на работата на комисијата, за бизнисот, културата, образованието, одбраната, говорот на омраза. Предложивме да се посочат конкретни органи, кои ќе реагираат, кога ќе биде потребно, за намалување на говорот на омраза“,
вели Захариева.
Како пренесува МИА од Софија, Захариева се осврнува и на руското влијание на Западниот Балкан. Наспроти последниот извештај на ЕК за земјава, кој укажува на над 92 проценти усогласеност со заедничката надворешна политика на ЕУ, бугарската министерка оценува дека некои од земјите кандидати за членство во ЕУ од регионот се многу малку усогласени со заедничката надворешна политика на ЕУ кон Русија, како резултат на влијанието на Москва врз нив.
„Северна Македонија е една од овие земји, со исклучително низок процент, под 50 отсто, на усогласеност со заедничката надворешна политика на ЕУ. Србија, исто така, е една од оние земји со помал процент, но не толку низок како Република Северна Македонија“,
тврди Захариева, посочувајќи дека Албанија има прилично висока стапка на усогласеност во областа на надворешната политика со ЕУ.
Захариева оценува дека е важно овие земји да се реформираат и да одлучат дали ќе бидат сојузници на НАТО и дали ќе бидат членки на ЕУ, а не еден од нејзините соседи.
„Во интерес на Бугарија е Северна Македонија да оди по патот на зачленување (во ЕУ), но да биде искрена и не само со зборови. Се обидуваме да ги намалиме тензиите“,
изјави Захариева за БНР.