Министерот за здравство Венко Филипче денеска соопшти дека во Министерството за здравство се отвораат понудите за набавка на респираторни машини, при што предност ќе се даде на рокот на испораката.
Филипче истакна дека ситуацијата на светскиот пазар е таква што постои голема побарувачка од вакви машини поради пандемијата со ковид-19.
Владата на седницата од 3 април донесе Уредба со законска сила за интервентна набавка на респиратори за време на вонредната состојба со коронавирусот.
Станува збор за купување на 200 респираторни машини, а за набавката Министерството за здравство беше задолжено да објави јавен повик на својата веб-страница.
Оценката на понудите ќе ја врши тричлена комисија составена од вработени административци во Министерството.
Власта и претходно имаше обид за набавка на респиратори, но тој тендер беше поништен бидејќи, како што објасни министерот Венко Филипче, ниту една фирма не го исполнила условот за достава во краток период.
Министерот за надворешни работи Никола Димитров пред два дена рече дека од кинеските власти има позитивен одговор за кинеска помош, меѓу која и респиратори, но дека не се знае кога може да се очекува испораката на опремата поради големиот број земји што бараат помош.
Филипче информира и дека дел се во тек, а дел се завршени постапки за набавка на заштитна опрема и реагенси. Денеска започнува постапка за набавка на 3 000 реагенси за лабораторијата во Институтот за јавно здравје.
Денеска е објавена и листа на донатори на сметката на која се донираат парични средства. Досега се собрани 60 милиони денари и Филипче изрази благодарност до сите компании и поединци, најавувајќи дека сите ќе се употребат за материјали за овие пациенти.