На прашањето дали и кога може да се очекува кинеска помош за Македонија во опрема за справување со коронавирусот, министерот за надворешни работи Никола Димитров вели дека од кинеските власти има позитивен одговор, но дека не се знае кога може да се очекува испораката на опремата поради големиот број земји кои бараат помош.
„Добивме политички позитивен одговор, не само за респираторите туку за целата листа, но Кина е преплавена со барања за помош од целиот свет и ќе ѝ треба некое време за да излезе со информација во смисла за квантитет и во смисла на време – кога“,
порача Димитров на прес-конференцијата со унгарскиот колега Петер Сијарто.
Коментирајќи дали и Европската Унија покажала доволна солидарност во битката со пандемијата, Димитров потсети дека веќе се најавени 4 милиони евра помош за здравствениот систем и 60 милиони евра за справување со економските последици. Дополнително, како што вели, побарана е и поддршка и преку механизмите на НАТО.
Помош вели е најавена и од Норвешка преку Обединетите Нации, Холандија, Турција и други земји со кои се преговара. При денешната посета, донации донесе и шефот на унгарската дипломатија Сијарто од 100 000 маски и 5 000 заштитни скафандери.
Димитров порача дека очекува помош и од други земји, но дека е многу важно е да се активираат и домашните капацитети за производство на заштитни маски.