Координацијата меѓу земјите членки на ЕУ во борбата со коронавирусот беше задоцнета и државите беа оставени сами да се борат, но Унгарија очекува да им понуди поефикасна помош на државите од Западен Балкан, меѓу кои и на Северна Македонија.
Ова го порача шефот на унгарската дипломатија Петер Сијарто, кој на негова иницијатива денеска е во работна посета на Скопје, на која донесе донација од 100 000 маски 5 000 заштитни костими за здравствените власти.
Сијарто, честитајќи му на неговиот колега Никола Димитров за влезот на државата во НАТО и „зеленото светло“ за старт со преговори со ЕУ, порача дека Унгарија очекувала вакви одлуки многу порано и дека ќе се обиде во Европскиот совет да издејствува преговарачкиот процес за Северна Македонија да почне најдоцна до јуни.
Сепак, вели во сите овие процеси и предизвици со пандемијата, не смее да се заборави миграцискиот бран.
„Ние многу добро знаеме колку е важно на Западен Балкан да владее мир и овие работи не придвижуваат кон тоа. Но, не смееме да заборавиме ни во рамки на предизвиците од кризата со коронавирус, дека друг огромен предизвик е миграцискиот бран и притисокот на турско-грчката граница“,
порача Сијарто.
Унгарскиот министер вели само годинава унгарските и македонските полицајци спречиле над 5 000 обиди за нелегален премин на границите и порача дека земјите мора да се посветат и на ова прашање.
„Ние, Унгарците, водиме одговорна политика кон нашите соседи и веќе им дадовме помош на другите земји како Словенија, Хрватска, Србија, бидејќи ако овие држави ослабат во кој било поглед тогаш и нивните капацитети за одбрана се намалуваат и ако се соочат со миграциски притисок нема да можат да го запрат, а ние имаме огромен интерес со тој притисок да се справуваме што подалеку од нас“,
порача Сијарто.
Помошта во заштитна одбрана вели е донесена како резултат на нивната соработка со Кина која ги снабдува со резерви, а веќе купиле кинеска фабрика за производство на заштитни маски.
Министерот за надворешни работи Никола Димитров изрази благодарност до унгарскиот колега за поддршката во процесот на евроинтеграциите и за донациите за борба со коронавирусот. Вели дека посетата зборува многу повеќе за пријателството и посветеноста, затоа што доаѓа во вонредни услови.
„Вирусот нема национална припадност. Ќе мора да научиме да работиме заедно и да ставиме точка на овој огромен предизвик, кој веројатно е прв од толкав размер по Втората светска војна.“,
порача Димитров.