Министерот Венко Филипче денеска соопшти дека набавката на респираторни машини е поништена бидејќи никој не можел да ги испорача за кратко период.
„Заврши јавната набавка на респираторни машини, иако успеавме да постигнеме релативно добра комерцијална цена од 16 илјади евра, ниту еден економски оператор не можеше да го задоволни критериумот за итна набавка заради тоа постапката во тој дел ќе се поништи. Министерството за здравство ќе даде предлог до Владата да ја спроведе истата“,
рече Филипче.
Министерот потенцираше дека сега состојбата е добра, има 120 респираторни машини и дека капацитетите на Инфективната клиника и на болницата „8-ми септември“ се спремни. Алудирајќи дека за кратко време нема да бидат потребни многу респиратори, министерот посочи дека светските искуства покажуваат дека од респираторни машини имаат потреба околу 5 проценти од заразените со коронавирус.
На тема за нававката на респиратори Филипче зборуваше и изминатите два дена. Прво, во четвртокот изјави дека набавката е завршена и ќе следи процес на аукција за намалување на цените.
Вчера, пак, тој алудираше дека респиратори ќе се набават преку Бразил зашто понудувачот за тие машини бил единствениот кој можел да испорача за кратко време. Но, проблем, рече Филипче, е што респираторите се заглавени во Бразил.
„Со интензивна комуникација со МНР и нашиот амбасадор во Бразил се обидуваме таа бројка на машини да ја ослободиме. Многу земји во светот го запреа извозот на респираторни машини чувајќи ги за своите пациенти“,
рече Филипче.